Read Ang Biblia, 2001 Job 38 Bible Online

Job 38 - Ang Biblia, 2001 bible

Job 38

¹At mula sa ipu-ipo'y sumagot ang PANGINOON kay Job:

²“Sino ba itong nagpapadilim ng payo sa pamamagitan ng mga salitang walang kaalaman?

³Bigkisan mo tulad sa lalaki ang iyong baywang, tatanungin kita at ikaw sa akin ay magsasaysay.

⁴“Nasaan ka nang ilagay ko ang mga pundasyon ng lupa? Sabihin mo, kung mayroon kang pang-unawa.

⁵Sinong nagpasiya ng mga sukat niyon — tiyak na alam mo! O sinong nag-unat ng panukat sa ibabaw nito?

⁶Sa ano nakabaon ang kanyang mga pundasyon? O sinong naglagay ng batong panulok niyon;

⁷nang sama-samang umawit ang mga tala sa umaga, at ang lahat ng mga anak ng Diyos ay nagsigawan sa tuwa?

⁸“O sinong nagsara ng mga pinto sa karagatan, nang ito'y magpumiglas mula sa sinapupunan;

⁹nang gawin ko ang mga ulap na bihisan niyon, at ang malalim na kadiliman na pinakabalot niyon,

¹⁰at nagtakda para doon ng mga hangganan, at naglagay ng mga halang at mga pintuan,

¹¹at aking sinabi, ‘Hanggang doon ka makakarating, at hindi ka na lalayo, at dito'y titigil ang iyong mga along palalo?’

¹²“Nautusan mo na ba ang umaga buhat nang magsimula ang iyong mga araw, at naipaalam mo ba sa bukang-liwayway ang kanyang kalalagyan;

¹³upang mahawakan nito ang mga laylayan ng daigdig, at ang masasama mula roon ay maliglig?

¹⁴Parang luwad sa ilalim ng tatak ito'y nababago, at ito'y kinukulayan na gaya ng isang baro.

¹⁵Mula sa masama ay pinipigil ang kanilang ilaw, at nabalian ang kanilang nakataas na kamay.

¹⁶“Nakapasok ka na ba sa mga bukal ng karagatan? O nakalakad ka ba sa mga landas ng kalaliman?

¹⁷Ipinahayag na ba sa iyo ang mga pintuan ng kamatayan? O nakita mo na ba ang mga pinto ng malalim na kadiliman?

¹⁸Nabatid mo na ba ang kaluwangan ng daigdig? Ipahayag mo, kung lahat ng ito'y iyong batid.

¹⁹“Nasaan ang daan patungo sa tahanan ng tanglaw, at saan naroon ang dako ng kadiliman,

²⁰upang ito'y iyong madala sa nasasakupan niyon, at upang malaman mo ang mga landas patungo sa bahay niyon?

²¹Nalalaman mo, sapagkat noon ikaw ay isinilang, at marami ang bilang ng iyong mga araw!

²²“Nakapasok ka na ba sa mga tipunan ng niyebe, o nakita mo na ba ang mga imbakan ng yelo,

²³na aking inilalaan sa panahon ng kaguluhan, para sa araw ng labanan at ng digmaan?

²⁴Ano ang daan patungo sa dakong ipinamamahagi ang ilaw? O ang lugar na ikinakalat sa ibabaw ng lupa ang hanging silangan?

²⁵“Sinong humukay ng daluyan para sa mga agos ng ulan, at para sa kislap ng kidlat ay gumawa ng daanan,

²⁶upang magpaulan sa lupang hindi tinatahanan ng tao, sa disyerto na kung saan ay walang tao;

²⁷upang busugin ang giba at sirang lupa, at upang sibulan ng damo ang lupa?

²⁸“Mayroon bang ama ang ulan? O sa mga patak ng hamog ay sino ang nagsilang?

²⁹Sa kaninong bahay-bata ang yelo ay nagmula? At sino ang sa namuong hamog sa langit ang nagsilang kaya?

³⁰Ang tubig ay nagiging sintigas ng bato, at ang ibabaw ng kalaliman ay nabubuo.

³¹“Ang mga tanikala ng Pleyades ay iyo bang matatalian, o ang mga tali ng Orion ay iyo bang makakalagan?

³²Maaakay mo ba ang pangkat ng mga bituin sa kanilang kapanahunan, o ang Oso na kasama ng kanyang mga anak ay iyo bang mapapatnubayan?

³³Alam mo ba ang mga tuntunin ng langit? Maitatatag mo ba ang kanilang kapangyarihan sa daigdig?

³⁴“Mailalakas mo ba hanggang sa mga ulap ang iyong tinig, upang matakpan ka ng saganang tubig?

³⁵Makakapagsugo ka ba ng mga kidlat, upang sila'y humayo, at magsabi sa iyo, ‘Kami'y naririto’?

³⁶Sinong naglagay sa mga ulap ng karunungan? O sinong nagbigay sa mga ambon ng kaalaman?

³⁷Sinong makakabilang ng mga ulap sa pamamagitan ng karunungan? O sinong makapagtatagilid ng mga sisidlang-tubig ng kalangitan,

³⁸kapag ang alabok ay nagkakabit-kabit, at ang tigkal na lupa ay mabilis na naninikit?

³⁹“Maihuhuli mo ba ng biktima ang leon? O mabubusog mo ba ang panlasa ng mga batang leon,

⁴⁰kapag sila'y yumuyuko sa kanilang mga lungga, at nagtatago sa guwang upang mag-abang ng masisila?

⁴¹Sinong nagbibigay sa uwak ng kanyang pagkain, kapag ang kanyang mga inakay sa Diyos ay dumaraing, at nagsisigala dahil sa walang pagkain?