Read Ang Biblia, 2001 Job 6 Bible Online

Job 6 - Ang Biblia, 2001 bible

Job 6

¹Pagkatapos ay sumagot si Job at sinabi,

²“O tinimbang sana ang aking pagkayamot, at lahat ng aking mga sakuna ay inilagay sana sa mga timbangan.

³Sapagkat kung gayon iyon ay magiging mas mabigat pa kaysa buhangin sa dagat; kaya't ang aking mga salita ay naging padalus-dalos.

⁴Sapagkat ang mga palaso ng Makapangyarihan sa lahat ay nasa akin, iniinom ng aking espiritu ang kanilang lason; ang mga kilabot ng Diyos ay nakahanay laban sa akin.

⁵Umuungal ba ang mailap na asno kapag mayroon siyang damo? O inuungalan ba ng baka ang kanyang pagkain?

⁶Ang wala bang lasa ay makakain nang walang asin? O mayroon bang lasa ang puti ng isang itlog?

⁷Wala akong ganang hawakan ang mga iyon; ang mga iyon ay parang nakakapandiring pagkain sa akin.

⁸“Makamit ko nawa ang aking kahilingan; at ipagkaloob nawa ng Diyos ang aking minimithi;

⁹na kalugdan nawa ng Diyos na durugin ako; na ibitaw niya ang kanyang kamay, at putulin ako!

¹⁰Ito nga ang magiging kaaliwan ko; magsasaya pa ako sa walang tigil na sakit; sapagkat hindi ko itinakuwil ang mga salita ng Banal.

¹¹Ano ang aking lakas, upang ako'y maghintay? At ano ang aking wakas upang ako'y magtiis?

¹²Ang lakas ko ba ay lakas ng mga bato, o ang laman ko ba ay tanso?

¹³Sa totoo ay walang tulong sa akin, at anumang mapagkukunan ay inilayo sa akin.

¹⁴“Siyang nagkakait ng kagandahang-loob sa kanyang kaibigan ay nagtatakuwil ng takot sa Makapangyarihan sa lahat.

¹⁵Ang aking mga kapatid ay mapandayang tulad sa batis, na parang daluyan ng mga batis na lumilipas,

¹⁶na madilim dahil sa yelo, malabo dahil sa natutunaw na niyebe.

¹⁷Sa panahon ng init, sila'y nawawala; kapag mainit, sila'y nawawala sa kanilang kinalalagyan.

¹⁸Ang mga pangkat ng manlalakbay ay lumilihis sa kanilang daan; umaakyat sila sa pagkapahamak at namamatay.

¹⁹Tumitingin ang mga pulutong ng manlalakbay mula sa Tema, umaasa ang mga manlalakbay mula sa Sheba.

²⁰Sila'y nabigo, sapagkat sila'y nagtiwala; sila'y pumaroon at sila'y nalito.

²¹Naging ganyan kayo ngayon sa akin, nakikita ninyo ang aking kasawian at kayo'y natatakot.

²²Sinabi ko ba: ‘Bigyan ninyo ako ng kaloob?’ O, ‘Mula sa inyong yaman ay handugan ninyo ako ng suhol?’

²³O, ‘Iligtas ninyo ako mula sa kamay ng kaaway?’ O, ‘Tubusin ninyo ako mula sa kamay ng mga manlulupig?’

²⁴“Turuan ninyo ako, at ako'y tatahimik; ipaunawa ninyo sa akin kung paano ako nagkamali.

²⁵Napakatindi ng mga tapat na salita! Ngunit ang inyong saway, ano bang sinasaway?

²⁶Sa akala ba ninyo ay masasaway ninyo ang mga salita, gayong ang mga salita ng taong sawi ay hangin?

²⁷Magpapalabunutan nga kayo para sa ulila, at magtatawaran para sa inyong kaibigan.

²⁸“Subalit ngayon, tumingin kayo sa akin na may kaluguran, sapagkat hindi ako magsisinungaling sa inyong harapan.

²⁹Bumalik kayo, isinasamo ko sa inyo, huwag magkaroon ng kamalian. Oo, kayo'y magsibalik, nakataya rito ang aking katuwiran.

³⁰May masama ba sa aking dila? Hindi ba nakakabatid ng kasawian ang aking panlasa?