Read Ang Biblia, 2001 Job 8 Bible Online

Job 8 - Ang Biblia, 2001 bible

Job 8

¹Pagkatapos ay sumagot si Bildad na Suhita, at sinabi,

²“Hanggang kailan mo sasabihin ang mga bagay na ito, at ang mga salita ng iyong bibig na gaya ng malakas na hangin?

³Binabaluktot ba ng Diyos ang katarungan? O nililiko ba ng Makapangyarihan sa lahat ang matuwid?

⁴Kung ang iyong mga anak ay nagkasala laban sa kanya, sa kapangyarihan ng kanilang pagsalangsang ay kanyang ibinigay sila.

⁵Kung hahanapin mo ang Diyos, at dadaing ka sa Makapangyarihan sa lahat;

⁶kung ikaw ay dalisay at matuwid; tiyak na gigising siya dahil sa iyo, at ibabalik ka sa iyong matuwid na tirahan.

⁷At bagaman maliit ang iyong pasimula, ang iyong huling wakas ay magiging napakadakila.

⁸“Sapagkat magsiyasat ka sa mga nagdaang panahon, hinihiling ko sa iyo, at isaalang-alang mo ang natuklasan ng mga ninuno;

⁹sapagkat tayo'y sa kahapon lamang, at walang nalalaman, sapagkat ang ating mga araw sa lupa ay isang anino.

¹⁰Hindi ka ba nila tuturuan, at sasabihin sa iyo, at bibigkas ng mga salita mula sa kanilang pang-unawa?

¹¹“Lalago ba ang yantok kung walang latian? Tutubo ba ang tambo kung walang tubig?

¹²Habang namumukadkad pa at hindi pa pinuputol, una silang nalalanta kaysa alinmang halaman.

¹³Gayon ang mga landas ng lahat ng lumilimot sa Diyos; ang pag-asa ng masamang tao ay maglalaho.

¹⁴Ang kanyang pagtitiwala ay masisira, at sapot ng gagamba ang kanyang tiwala.

¹⁵Siya'y sasandal sa kanyang bahay, ngunit ito'y hindi tatayo; siya'y hahawak dito, ngunit hindi ito magtatagal.

¹⁶Siya'y nananariwa sa harap ng araw, at ang kanyang mga suwi ay sumisibol sa kanyang halamanan.

¹⁷Ang kanyang mga ugat ay kumapit sa palibot ng bunton, kanyang minamasdan ang dako ng mga bato.

¹⁸Kung siya'y nawasak sa kanyang kinalalagyan, kung magkagayo'y ikakaila siya nito, na sinasabi: ‘Hindi kita kailanman nakita.’

¹⁹Tingnan mo, ito ang kagalakan ng landas niya; at mula sa lupa ay sisibol ang iba.

²⁰“Tingnan mo, hindi itatakuwil ng Diyos ang taong walang kapintasan, ni aalalayan man ang kamay ng mga gumagawa ng kasamaan.

²¹Kanya namang pupunuin ng pagtawa ang iyong bibig, at ang iyong mga labi ng pagsigaw.

²²Silang napopoot sa iyo ay mabibihisan ng kahihiyan, at ang tolda ng masama ay mapaparam.”