Read Ang Biblia, 2001 Mga Awit 103 Bible Online

Mga Awit 103 - Ang Biblia, 2001 bible

Mga Awit 103

¹Purihin mo ang PANGINOON, O kaluluwa ko; at lahat ng nasa loob ko, purihin ang kanyang banal na pangalan!

²Purihin mo ang PANGINOON, O kaluluwa ko, at huwag mong kalimutan ang lahat niyang mga biyaya —

³na siyang nagpapatawad ng lahat mong mga kasamaan; na siyang nagpapagaling ng lahat mong karamdaman,

⁴na siyang tumutubos ng iyong buhay sa Hukay: na siyang nagpuputong sa iyo ng habag at tapat na pagmamahal,

⁵na siyang bumubusog sa iyong nasa ng mga mabubuting bagay; anupa't nababago na gaya ng sa agila ang iyong kabataan.

⁶Ang PANGINOON ay nagsasagawa ng mga matuwid na gawa at katarungan sa lahat ng naaapi.

⁷Kanyang ipinaalam ang kanyang mga daan kay Moises, ang kanyang mga gawa sa mga anak ni Israel.

⁸Ang PANGINOON ay mahabagin at mapagbiyaya, hindi magagalitin at sa tapat na pag-ibig ay sagana.

⁹Hindi siya laging makikipaglaban, ni pananatilihin ang kanyang galit magpakailanman.

¹⁰Hindi niya tayo pinakikitunguhan ayon sa ating mga kasalanan, ni ginantihan tayo nang ayon sa ating mga kasamaan.

¹¹Sapagkat kung paanong ang mga langit ay mataas kaysa lupa, ang kanyang tapat na pag-ibig sa mga natatakot sa kanya ay gayon kadakila!

¹²Kung gaano ang layo ng silangan sa kanluran, gayon inilayo niya sa atin ang ating mga pagsuway.

¹³Kung paanong ang ama ay nahahabag sa mga anak niya, gayon nahahabag ang PANGINOON sa mga natatakot sa kanya.

¹⁴Sapagkat ang ating kalagayan ay kanyang nalalaman, naaalala niya na tayo'y alabok.

¹⁵Tungkol sa tao, ang kanyang mga araw ay parang damo, siya'y lumalagong gaya ng bulaklak sa parang;

¹⁶ito'y dinaanan ng hangin, at ito'y naglaho, at ang mga lugar niyon ay hindi na nalalaman.

¹⁷Ngunit ang tapat na pag-ibig ng PANGINOON ay mula sa walang hanggan hanggang sa walang hanggan para sa mga natatakot sa kanya, at ang kanyang katuwiran ay hanggang sa mga anak ng mga anak,

¹⁸sa mga nag-iingat ng tipan niya, at sa nakakaalalang gawin ang mga utos niya.

¹⁹Itinatag ng PANGINOON ang kanyang trono sa mga kalangitan, at naghahari sa lahat ang kanyang kaharian.

²⁰Purihin ninyo ang PANGINOON, kayong mga anghel niya; kayong mga makapangyarihan sa kalakasan na gumaganap ng kanyang salita, na nakikinig sa tinig ng kanyang salita!

²¹Purihin ninyo ang PANGINOON, kayong lahat ng hukbo niya; kayong mga lingkod niya na nagsisigawa ng kanyang kalooban!

²²Purihin ninyo ang PANGINOON, lahat ng kanyang mga gawa, sa lahat ng dako ng kanyang kapamahalaan. Purihin mo ang PANGINOON, O kaluluwa ko.