Read Ang Biblia, 2001 Mga Awit 109 Bible Online

Mga Awit 109 - Ang Biblia, 2001 bible

Mga Awit 109

¹Huwag kang manahimik, O Diyos ng aking pagpupuri!

²Sapagkat ang masama at mandarayang bibig ay nabuksan laban sa akin, na nagsasalita laban sa akin na may dilang sinungaling.

³May mga salita ng pagkapoot na ako'y kanilang pinalibutan, at lumaban sa akin nang walang kadahilanan.

⁴Kapalit ng aking pag-ibig sila ay mga tagausig ko, ngunit ako ay nasa panalangin.

⁵Kaya't ginantihan nila ng masama ang kabutihan ko, at pagkapoot sa pag-ibig ko.

⁶“Pumili kayo ng masamang tao laban sa kanya, at tumayo nawa ang isang tagausig sa kanyang kanang kamay.

⁷Kapag siya'y nilitis, lumabas nawa siyang nagkasala, at ibilang nawang kasalanan ang kanyang dalangin!

⁸Maging kakaunti nawa ang kanyang mga araw, kunin nawa ng iba ang kanyang katungkulan.

⁹Ang kanyang mga anak nawa ay maulila, at mabalo ang kanyang asawa!

¹⁰Magsilaboy nawa ang kanyang mga anak, at mamalimos; at hanapin nila ang kanilang pagkain sa kanilang mga guhong tahanan.

¹¹Samsamin nawa ng nagpapautang ang lahat niyang kayamanan; nakawin nawa ang mga bunga ng kanyang paggawa ng mga dayuhan!

¹²Wala nawang maging mabait sa kanya; ni maawa sa kanyang mga anak na ulila!

¹³Maputol nawa ang kanyang susunod na lahi, mapawi nawa ang kanyang pangalan sa ikalawang salinlahi!

¹⁴Maalala nawa ng PANGINOON ang kasamaan ng kanyang mga magulang, huwag nawang mapawi ang kasalanan ng kanyang ina!

¹⁵Malagay nawa silang patuloy sa harapan ng PANGINOON, at maputol nawa ang kanyang alaala mula sa lupa!

¹⁶Sapagkat hindi niya naalalang magpakita ng kabaitan, kundi inusig ang dukha at nangangailangan, at ang may bagbag na puso upang patayin.

¹⁷Iniibig niya ang manumpa, kaya't dumating sa kanya! At hindi siya nalugod sa pagpapala, kaya't malayo sa kanya!

¹⁸Nagsusuot siya ng sumpa na parang kanyang damit, at pumasok sa kanyang katawan na parang tubig, sa kanyang mga buto na gaya ng langis!

¹⁹Ito nawa'y maging gaya ng kasuotang kanyang ibinabalabal, gaya ng pamigkis na kanyang ipinamimigkis araw-araw!”

²⁰Ito nawa ang maging ganti sa mga nagbibintang sa akin mula sa PANGINOON, sa mga nagsasalita ng kasamaan laban sa aking buhay!

²¹Ngunit ikaw, O Diyos kong PANGINOON, gumawa ka para sa akin alang-alang sa iyong pangalan, sapagkat ang iyong tapat na pag-ibig ay mabuti, iligtas mo ako!

²²Sapagkat ako'y dukha at nangangailangan, at ang aking puso ay nasaktan sa loob ko.

²³Ako'y naglalahong gaya ng anino kapag ito'y humahaba, ako'y nililiglig na gaya ng balang.

²⁴Ang aking mga tuhod ay mahina dahil sa pag-aayuno, ang aking laman ay nagkukulang ng katabaan.

²⁵Ako nama'y naging hamak sa kanila, kapag nakikita nila ako, ang ulo nila ay kanilang iniiling.

²⁶O PANGINOON kong Diyos! Tulungan mo ako; ayon sa iyong tapat na pag-ibig ako ay iligtas mo.

²⁷Hayaan mong malaman nila na ito'y iyong kamay; ikaw, O PANGINOON, ang gumawa nito!

²⁸Hayaang sumumpa sila, ngunit magpala ka! Kapag sila'y bumangon sila'y mapapahiya, ngunit ang iyong lingkod ay magagalak!

²⁹Ang akin nawang mga kaaway ay masuotan ng kawalang-dangal; mabalot nawa sila sa kanilang kahihiyan na gaya ng sa isang balabal!

³⁰Sa pamamagitan ng aking bibig ay magpapasalamat ako nang napakalaki sa PANGINOON, pupurihin ko siya sa gitna ng maraming tao.

³¹Sapagkat siya'y tumatayo sa kanang kamay ng nangangailangan, upang iligtas siya sa mga nagsisihatol sa kanyang kaluluwa.