Read Ang Biblia, 2001 Mga Awit 118 Bible Online

Mga Awit 118 - Ang Biblia, 2001 bible

Mga Awit 118

¹O magpasalamat kayo sa PANGINOON, sapagkat siya'y mabuti; ang kanyang tapat na pag-ibig ay nananatili magpakailanman.

²Sabihin ngayon ng Israel, “Ang kanyang tapat na pag-ibig ay nananatili magpakailanman.”

³Sabihin ngayon ng sambahayan ni Aaron, “Ang kanyang tapat na pag-ibig ay nananatili magpakailanman.”

⁴Sabihin ngayon ng mga natatakot sa PANGINOON, “Ang kanyang tapat na pag-ibig ay nananatili magpakailanman.”

⁵Tumawag ako sa PANGINOON mula sa aking pagkabalisa, sinagot ako ng PANGINOON, at inilagay ako sa maluwag na dako.

⁶Ang PANGINOON ay para sa akin, hindi ako matatakot. Anong magagawa ng tao sa akin?

⁷Ang PANGINOON ay kakampi ko, kasama ng mga tumutulong sa akin, ako'y titinging may pagtatagumpay sa mga napopoot sa akin.

⁸Higit na mabuti ang manganlong sa PANGINOON kaysa magtiwala sa tao.

⁹Higit na mabuti ang manganlong sa PANGINOON kaysa magtiwala sa mga pinuno.

¹⁰Pinalibutan ako ng lahat ng mga bansa; sa pangalan ng PANGINOON, tiyak na pupuksain ko sila.

¹¹Pinalibutan nila ako, oo, pinalibutan nila ako, sa pangalan ng PANGINOON, sila ay tiyak na pupuksain ko.

¹²Pinalibutan nila akong gaya ng mga pukyutan, sila'y nasunog na parang apoy ng mga dawagan; sa pangalan ng PANGINOON sila'y tiyak na pupuksain ko.

¹³Itinulak mo ako nang malakas, anupa't ako'y malapit nang mabuwal, ngunit tinulungan ako ng PANGINOON.

¹⁴Ang PANGINOON ay aking awit at kalakasan, at siya'y naging aking kaligtasan.

¹⁵Ang tunog ng masayang sigawan at kaligtasan ay nasa mga tolda ng matuwid: “Ang kanang kamay ng PANGINOON ay gumagawang may katapangan,

¹⁶ang kanang kamay ng PANGINOON ay parangalan, ang kanang kamay ng PANGINOON ay gumagawang may katapangan!”

¹⁷Hindi ako mamamatay, kundi mabubuhay, at ang mga gawa ng PANGINOON ay isasalaysay.

¹⁸Pinarusahan akong mabuti ng PANGINOON; ngunit hindi niya ako ibinigay sa kamatayan.

¹⁹Buksan ninyo sa akin ang mga pintuan ng katuwiran; upang ako'y makapasok doon at makapagpasalamat sa PANGINOON.

²⁰Ito ang pintuan ng PANGINOON; ang matuwid ay papasok doon.

²¹Ako'y magpapasalamat sa iyo sapagkat sinagot mo ako at ikaw ay naging kaligtasan ko.

²²Ang batong itinakuwil ng mga nagtayo, ay naging panulok na bato.

²³Ito ang gawa ng PANGINOON; ito ay kagila-gilalas sa ating mga mata.

²⁴Ito ang araw na ang PANGINOON ang gumawa, tayo'y magalak at matuwa.

²⁵O PANGINOON, ipinapakiusap namin sa iyo, ikaw ay magligtas! O PANGINOON, ipinapakiusap namin sa iyo, magsugo ka ng kaginhawahan.

²⁶Mapalad siya na dumarating sa pangalan ng PANGINOON! Pinupuri ka namin mula sa bahay ng PANGINOON.

²⁷Ang PANGINOON ay Diyos, at binigyan niya kami ng liwanag! Talian ninyo ang hain ng mga panali, sa mga sungay ng dambana.

²⁸Ikaw ay aking Diyos, at ako'y magpapasalamat sa iyo; ikaw ay aking Diyos, ikaw ay pupurihin ko.

²⁹O magpasalamat kayo sa PANGINOON, sapagkat siya'y mabuti, sapagkat ang kanyang tapat na pag-ibig ay nananatili magpakailanman!