Read Ang Biblia, 2001 Mga Awit 141 Bible Online

Mga Awit 141 - Ang Biblia, 2001 bible

Mga Awit 141

¹Tumatawag ako sa iyo, O PANGINOON; magmadali ka sa akin! Pakinggan mo ang tinig ko, kapag ako'y tumatawag sa iyo.

²Ibilang mo ang aking dalangin na parang insenso sa iyong harapan, at ang pagtataas ng aking mga kamay ay handog sa kinahapunan.

³Maglagay ka ng bantay sa aking bibig, O PANGINOON. Ingatan mo ang pintuan ng aking mga labi!

⁴Huwag mong ihilig ang aking puso sa anumang masama, na ako'y gumawa ng masasamang gawa, na kasama ng mga taong gumagawa ng masama, at huwag mo akong pakainin ng masasarap na pagkain nila.

⁵Sugatan nawa ako ng matuwid sa kagandahang-loob at sawayin niya ako, ito'y langis sa ulo; huwag nawang tanggihan ng aking ulo, sapagkat ang aking panalangin ay laging laban sa kanilang mga gawang liko.

⁶Ang kanilang mga hukom ay inihagis sa mga tabi ng malaking bato, at kanilang diringgin ang aking mga salita sapagkat sila ay maiinam.

⁷Gaya ng isang nag-aararo at nagbubungkal ng lupa, gayon ang kanilang mga buto sa bibig ng Sheol ay ikakalat.

⁸Subalit ang mga mata ko, O Panginoong DIYOS, sa iyo'y nakatuon; sa iyo ako nanganganlong; huwag mo akong iwang walang kalaban-laban!

⁹Iligtas mo ako sa patibong na para sa akin ay kanilang inilagay, at mula sa mga bitag ng mga manggagawa ng kasamaan!

¹⁰Mahulog nawa ang masasama sa kanilang sariling mga lambat, habang ako naman ay tumatakas.