Read Ang Biblia, 2001 Mga Awit 143 Bible Online

Mga Awit 143 - Ang Biblia, 2001 bible

Mga Awit 143

¹Pakinggan mo, O PANGINOON, ang aking dalangin, iyong dinggin ang aking mga daing! Sa iyong katapatan, sa iyong katuwiran, ako'y iyong sagutin!

²At huwag kang pumasok na kasama ng iyong lingkod sa kahatulan; sapagkat walang taong nabubuhay na matuwid sa iyong harapan.

³Sapagkat inusig ng kaaway ang aking kaluluwa; kanyang dinurog sa lupa ang aking buhay, pinatira niya ako sa madilim na dako gaya ng mga matagal nang patay.

⁴Kaya't ang aking espiritu ay nanlulupaypay sa loob ko; ang puso ko ay kinikilabutan sa loob ko.

⁵Aking naaalala ang mga araw nang una, aking ginugunita ang lahat mong ginawa; aking binubulay-bulay ang gawa ng iyong mga kamay.

⁶Iniuunat ko sa iyo ang aking mga kamay, ang kaluluwa ko'y uhaw sa iyo na gaya ng lupang tigang. (Selah)

⁷Magmadali ka, O PANGINOON, na ako'y iyong sagutin! Ang espiritu ko'y nanlulupaypay! Huwag mong ikubli ang iyong mukha sa akin; baka ako'y maging gaya nila na nagsibaba sa Hukay.

⁸Sa umaga'y iparinig sa akin ang iyong tapat na pag-ibig, sapagkat sa iyo ako ay nananalig. Ang daan na dapat kong lakaran sa akin ay ituro mo, sapagkat itinataas ko ang aking kaluluwa sa iyo.

⁹Iligtas mo ako sa aking mga kaaway, O PANGINOON, tumakas ako patungo sa iyo upang manganlong.

¹⁰Turuan mo akong gawin ang iyong kalooban, sapagkat ang aking Diyos ay ikaw! Akayin nawa ako ng iyong mabuting Espiritu sa landas na pantay!

¹¹Alang-alang sa iyong pangalan, O PANGINOON, muli akong buhayin! Sa iyong katuwiran ay ilabas mo ang aking kaluluwa mula sa kaguluhan,

¹²At sa iyong tapat na pag-ibig ay tanggalin mo ang aking mga kaaway, at iyong lipulin ang lahat ng nagpapasakit sa aking kaluluwa, sapagkat ako'y iyong lingkod.