Read Ang Biblia, 2001 Mga Awit 147 Bible Online

Mga Awit 147 - Ang Biblia, 2001 bible

Mga Awit 147

¹Purihin ang PANGINOON! Sapagkat mabuting umawit ng mga papuri sa ating Diyos; sapagkat siya'y mapagpala at ang awit ng papuri ay naaangkop.

²Itinatayo ng PANGINOON ang Jerusalem; kanyang tinitipon ang mga itinapon mula sa Israel.

³Kanyang pinagagaling ang mga may pusong wasak, at tinatalian ang kanilang mga sugat.

⁴Ang bilang ng mga bituin ay kanyang binibilang, ibinibigay niya sa kanilang lahat ang mga pangalan nila.

⁵Dakila ang ating PANGINOON, at sa kapangyarihan ay sagana, hindi masukat ang kanyang unawa.

⁶Inaalalayan ng PANGINOON ang nahihirapan, kanyang inilulugmok sa lupa ang masama.

⁷Umawit kayo ng may pagpapasalamat sa PANGINOON; umawit kayo sa lira ng mga papuri sa ating Diyos!

⁸Tinatakpan niya ng mga ulap ang mga kalangitan, naghahanda siya para sa lupa ng ulan, nagpapatubo siya ng damo sa kabundukan.

⁹Siya'y nagbibigay sa hayop ng kanilang pagkain, at sa mga inakay na uwak na nagsisidaing.

¹⁰Ang kanyang kaluguran ay wala sa lakas ng kabayo, ni ang kanyang kasiyahan sa mga binti ng tao,

¹¹ngunit ang PANGINOON ay nalulugod sa mga natatakot sa kanya, sa kanyang tapat na pag-ibig ay umaasa.

¹²Purihin mo, O Jerusalem, ang PANGINOON! Purihin mo ang iyong Diyos, O Zion!

¹³Sapagkat kanyang pinapatibay ang mga rehas ng iyong mga tarangkahan, pinagpapala niya ang mga anak mo sa loob mo.

¹⁴Siya'y gumagawa ng kapayapaan sa iyong mga hangganan; binubusog ka niya ng trigong pinakamainam.

¹⁵Kanyang sinusugo ang kanyang utos sa lupa; mabilis na tumatakbo ang kanyang salita.

¹⁶Siya'y nagbibigay ng niyebe na parang balahibo ng tupa; siya'y nagkakalat ng patak ng yelo na abo ang kagaya.

¹⁷Inihahagis niya ang kanyang yelo na parang tinapay na putol-putol, sinong makakatagal sa harap ng lamig niyon?

¹⁸Kanyang sinusugo ang kanyang salita, at tinutunaw ang mga iyon; kanyang pinahihihip ang kanyang hangin, at ang tubig ay dumadaloy.

¹⁹Kanyang ipinahayag ang kanyang salita sa Jacob, ang kanyang mga tuntunin at mga batas sa Israel.

²⁰Hindi niya ito ginawa sa alinmang bansa, at tungkol sa kanyang mga batas hindi nila ito nalalaman. Purihin ninyo ang PANGINOON!