Read Ang Biblia, 2001 Mga Awit 16 Bible Online

Mga Awit 16 - Ang Biblia, 2001 bible

Mga Awit 16

¹Ingatan mo ako, O Diyos, sapagkat sa iyo ako nanganganlong.

²Sinasabi ko sa PANGINOON, “Ikaw ay aking Panginoon; ako'y walang kabutihan kung hiwalay ako sa iyo.”

³Tungkol sa mga banal na nasa lupa, sila ang mararangal, sa kanila ako lubos na natutuwa.

⁴Yaong mga pumili ng ibang diyos ay nagpaparami ng kanilang mga kalungkutan; ang kanilang inuming handog na dugo ay hindi ko ibubuhos, ni babanggitin man sa aking mga labi ang kanilang mga pangalan.

⁵Ang PANGINOON ang aking piling bahagi at aking saro; ang aking kapalaran ay hawak mo.

⁶Ang pisi ay nahulog para sa akin sa magagandang dako; oo, ako'y may mabuting mana.

⁷Aking pupurihin ang PANGINOON na nagbibigay sa akin ng payo; maging sa gabi ay tinuturuan ako ng aking puso.

⁸Lagi kong pinananatili ang PANGINOON sa aking harapan; hindi ako matitinag, sapagkat siya ay nasa aking kanan.

⁹Kaya't ang aking puso ay masaya, at nagagalak ang aking kaluluwa; ang akin namang katawan ay tatahang payapa.

¹⁰Sapagkat ang aking kaluluwa sa Sheol ay hindi mo iiwan, ni hahayaan mong makita ng iyong banal ang Hukay.

¹¹Iyong ipinakita sa akin ang landas ng buhay: sa iyong harapan ay may kapuspusan ng kagalakan; sa iyong kanang kamay ay mga kasayahan magpakailanman.