Read Ang Biblia, 2001 Mga Awit 2 Bible Online

Mga Awit 2 - Ang Biblia, 2001 bible

Mga Awit 2

¹Bakit nagsasabwatan ang mga bansa, at sa walang kabuluhan ang mga bayan ay nagpaplano?

²Inihanda ng mga hari sa lupa ang kanilang sarili, at ang mga pinuno ay nagsisangguni, laban sa PANGINOON at sa kanyang binuhusan ng langis, na nagsasabi,

³“Ang kanilang panggapos ay ating lagutin, at itapon ang kanilang mga panali mula sa atin.”

⁴Siya na nakaupo sa kalangitan ay tumatawa; at ang PANGINOON ay kumukutya sa kanila.

⁵Kung magkagayo'y magsasalita siya sa kanila sa kanyang poot, at tatakutin sila sa kanyang matinding galit, na nagsasabi,

⁶“Gayunma'y inilagay ko ang aking hari sa Zion, sa aking banal na burol.”

⁷Aking sasabihin ang tungkol sa utos ng PANGINOON: Sinabi niya sa akin, “Ikaw ay aking anak, sa araw na ito kita ay ipinanganak.

⁸Humingi ka sa akin at ang mga bansa ay gagawin kong mana mo, at ang mga dulo ng lupa ay magiging iyo.

⁹Sila'y iyong babaliin ng pamalong bakal, at dudurugin mo sila gaya ng banga.”

¹⁰Kaya't ngayon, O mga hari, kayo'y magpakapantas; O mga pinuno ng lupa, kayo'y magsihanda.

¹¹Kayo'y maglingkod sa PANGINOON na may takot, at magalak na may panginginig,

¹²ang anak ay inyong hagkan, baka magalit siya at kayo'y mapahamak sa daan; sapagkat ang kanyang poot ay madaling mag-alab. Mapapalad ang lahat na nanganganlong sa kanya.