Read Ang Biblia, 2001 Mga Awit 30 Bible Online

Mga Awit 30 - Ang Biblia, 2001 bible

Mga Awit 30

¹Dadakilain kita, O PANGINOON, sapagkat ako'y iyong iniahon, at hindi hinayaang ako'y pagtawanan, ng aking mga kaaway.

²O PANGINOON kong Diyos, humingi ako sa iyo ng saklolo, at ako ay pinagaling mo.

³O PANGINOON, kaluluwa ko'y iniahon mula sa Sheol, iyong iningatan akong buháy upang huwag akong bumaba sa Hukay.

⁴Magsiawit kayo ng papuri sa PANGINOON, kayong kanyang mga banal, at magpasalamat kayo sa kanyang banal na pangalan.

⁵Sapagkat ang kanyang galit ay sandali lamang, at ang kanyang paglingap ay panghabang buhay. Maaaring magtagal nang magdamag ang pag-iyak, ngunit sa kinaumagahan ay dumarating ang galak.

⁶Tungkol sa akin, sinabi ko sa panahon ng aking kasaganaan, “Hindi ako matitinag kailanman.”

⁷Sa pamamagitan ng iyong paglingap, O PANGINOON, ginawa mong matibay ang aking bundok; ikinubli mo ang iyong mukha, ako ay natakot.

⁸Ako'y dumaing sa iyo, O PANGINOON; at sa PANGINOON ay nanawagan ako:

⁹“Anong pakinabang mayroon sa aking dugo, kung ako'y bumaba sa Hukay? Pupurihin ka ba ng alabok? Isasaysay ba nito ang iyong katapatan?

¹⁰O PANGINOON, sa aki'y maawa ka, pakinggan mo ako! PANGINOON, nawa'y tulungan mo ako.”

¹¹Iyong ginawang sayaw para sa akin ang pagtangis ko; hinubad mo ang aking damit-sako, at binigkisan mo ako ng kagalakan,

¹²upang luwalhatiin ka ng aking kaluluwa at huwag manahimik. O PANGINOON kong Diyos, ako'y magpapasalamat sa iyo magpakailanman.