Read Ang Biblia, 2001 Mga Awit 31 Bible Online

Mga Awit 31 - Ang Biblia, 2001 bible

Mga Awit 31

¹Sa iyo, O PANGINOON, ako'y humahanap ng kanlungan; huwag mong hayaang ako'y mapahiya kailanman; iligtas mo ako sa pamamagitan ng iyong katuwiran!

²Ikiling mo ang iyong pandinig sa akin; iligtas mo ako agad! Maging batong kanlungan ka nawa sa akin, isang matibay na muog upang ako'y iligtas.

³Oo, ikaw ang aking malaking bato at aking tanggulan; alang-alang sa iyong pangalan ako'y iyong akayin at patnubayan.

⁴Alisin mo ako sa bitag na kanilang lihim na inilagay para sa akin; sapagkat ikaw ang aking kalakasan.

⁵Sa iyong kamay ay ipinagkakatiwala ko ang aking espiritu, O PANGINOON, tapat na Diyos, tinubos mo ako.

⁶Kinapopootan ko ang mga nagpapahalaga sa mga walang kabuluhang diyus-diyosan, ngunit nagtitiwala ako sa PANGINOON.

⁷Ako'y matutuwa at magagalak dahil sa iyong tapat na pag-ibig, sapagkat nakita mo ang aking kapighatian, iyong binigyang-pansin ang aking mga kahirapan,

⁸at hindi mo ako ibinigay sa kamay ng kaaway; inilagay mo ang aking mga paa sa dakong malawak.

⁹Maawa ka sa akin, O PANGINOON, sapagkat ako'y nasa kahirapan; ang aking mata ay namumugto dahil sa kapanglawan, gayundin ang aking kaluluwa at katawan.

¹⁰Sapagkat ang aking buhay ay pagod na sa lungkot, at ang aking mga taon sa paghihimutok; dahil sa aking kasalanan, lakas ko'y nauubos, at ang aking mga buto ay nanghihina.

¹¹Sa lahat kong mga kaaway, ako ang tampulan ng pagkutya, lalung-lalo na sa aking mga kapwa, sa aking mga kakilala ay bagay na kinasisindakan, yaong mga nakakakita sa akin sa lansangan sa aki'y naglalayuan.

¹²Ako'y lumipas na sa isip gaya ng isang patay; ako'y naging gaya ng isang basag na sisidlan.

¹³Oo, aking naririnig ang bulungan ng marami — kakilabutan sa bawat panig! — habang sila'y magkakasamang nagpapanukala laban sa akin, habang sila'y nagsasabwatan upang buhay ko'y kunin.

¹⁴Ngunit nagtitiwala ako sa iyo, O PANGINOON, sinasabi ko, “Ikaw ang aking Diyos.”

¹⁵Ang aking mga panahon ay nasa iyong kamay; iligtas mo ako sa mga umuusig sa akin at sa kamay ng aking mga kaaway!

¹⁶Sa iyong lingkod, mukha mo nawa'y magliwanag, iligtas mo ako ng iyong pag-ibig na tapat!

¹⁷Huwag mong hayaang malagay ako sa kahihiyan, O PANGINOON, sapagkat sa iyo ako'y nananawagan, hayaang malagay ang masasama sa kahihiyan, na magsitahimik nawa sila sa Sheol.

¹⁸Mapipi nawa ang mga sinungaling na labi, na walang pakundangang nagsasalita laban sa matuwid nang may kapalaluan at paglait.

¹⁹O napakasagana ng kabutihan mo, na iyong inilaan para sa mga natatakot sa iyo, at ginawa para doon sa nanganganlong sa iyo, sa lihim na dako ng iyong harapan, sila'y iyong ikubli!

²⁰Sa iyong harapan ay palihim mo silang ikinubli sa mga banta ng mga tao; ligtas mo silang iniingatan sa lilim ng iyong tirahan mula sa palaaway na mga dila.

²¹Purihin ang PANGINOON, sapagkat kahanga-hanga niyang ipinakita sa akin ang kanyang kagandahang-loob sa isang lunsod na nakubkob.

²²Tungkol sa akin, sa pagkatakot ay aking sinabi, “Ako ay inilayo mula sa iyong paningin.” Gayunma'y pinakinggan mo ang mga tinig ng aking mga daing, nang ako'y dumaing sa iyo.

²³Ibigin ninyo ang PANGINOON, kayong lahat niyang mga banal! Iniingatan ng PANGINOON ang tapat, ngunit lubos niyang ginagantihan ang gumagawa na may kapalaluan.

²⁴Kayo'y magpakalakas, at magpakatapang ang inyong puso, kayong lahat na umaasa sa PANGINOON!