Read Ang Biblia, 2001 Mga Awit 4 Bible Online

Mga Awit 4 - Ang Biblia, 2001 bible

Mga Awit 4

¹Sagutin mo ako kapag tumatawag ako, O Diyos na tagapagtanggol ko! Binigyan mo ako ng silid nang ako'y nasa kagipitan. Maawa ka sa akin, at dalangin ko'y iyong pakinggan.

²O tao, hanggang kailan magdaranas ng kahihiyan ang aking karangalan? Gaano katagal mo iibigin ang mga salitang walang kabuluhan, at hahanapin ang kabulaanan? (Selah)

³Ngunit alamin ninyo na ibinukod ng PANGINOON para sa kanyang sarili ang banal; ang PANGINOON ay nakikinig kapag sa kanya ako'y nagdarasal.

⁴Magalit ka, subalit huwag kang magkakasala; magbulay-bulay ka ng iyong puso sa iyong higaan, at tumahimik ka. (Selah)

⁵Maghandog kayo ng matuwid na mga alay, at ang inyong pagtitiwala sa PANGINOON ilagay.

⁶Marami ang nagsasabi, “Sana'y makakita kami ng ilang kabutihan! O PANGINOON, ang liwanag ng iyong mukha sa amin ay isilay!”

⁷Ikaw ay naglagay ng kagalakan sa aking puso, kaysa nang ang kanilang butil at alak ay sagana.

⁸Payapa akong hihiga at gayundin ay matutulog; sapagkat ikaw lamang, O PANGINOON, ang gumagawa upang mamuhay ako sa katiwasayan.