Read Ang Biblia, 2001 Mga Awit 40 Bible Online

Mga Awit 40 - Ang Biblia, 2001 bible

Mga Awit 40

¹Matiyaga akong naghintay sa PANGINOON; kumiling siya sa akin at pinakinggan ang aking daing.

²Iniahon niya ako sa hukay ng pagkawasak, mula sa putikang lusak, at itinuntong niya ang mga paa ko sa isang malaking bato, at pinatatag ang aking mga hakbang.

³Nilagyan niya ng bagong awit ang aking bibig, isang awit ng pagpupuri sa ating Diyos. Marami ang makakakita at matatakot, at magtitiwala sa PANGINOON.

⁴Mapalad ang tao na kaniyang ginawang tiwala ang PANGINOON, na hindi bumabaling sa mga mapagmataas, pati sa mga naligaw sa kamalian.

⁵Pinarami mo, O PANGINOON kong Diyos, ang iyong mga kagila-gilalas na gawa at ang iyong mga pag-aalala sa amin; walang maaaring sa iyo'y ihambing! Kung aking ipahahayag ang mga iyon at isasaysay, ang mga iyon ay higit kaysa mabibilang.

⁶Hain at handog ay hindi mo ibig, ngunit binigyan mo ako ng bukas na pandinig. Handog na sinusunog at handog pangkasalanan ay hindi mo kinailangan.

⁷Nang magkagayo'y sinabi ko: “Narito, ako'y dumarating; sa balumbon ng aklat ay nakasulat ang tungkol sa akin;

⁸kinaluluguran kong sundin ang iyong kalooban, O Diyos ko; ang iyong kautusan ay nasa loob ng aking puso.”

⁹Ako'y nagpahayag ng masayang balita ng kaligtasan sa dakilang kapulungan; narito, ang aking mga labi ay hindi ko pipigilan, O PANGINOON, iyong nalalaman.

¹⁰Hindi ko ikinubli ang iyong katuwiran sa loob ng aking puso; ibinalita ko ang iyong katapatan at ang pagliligtas mo; hindi ko inilihim ang iyong tapat na pag-ibig at ang iyong katapatan sa dakilang kapulungan.

¹¹Huwag mong ipagkait sa akin, O PANGINOON, ang iyong kahabagan, lagi nawa akong ingatan ng iyong tapat na pag-ibig at ng iyong katapatan!

¹²Sapagkat pinaligiran ako ng kasamaang di mabilang, inabutan ako ng aking mga kasamaan, hanggang sa ako'y hindi makakita; sila'y higit pa kaysa mga buhok ng aking ulo, nanghihina ang aking puso.

¹³Kalugdan[1] mo nawa, O PANGINOON, na ako'y iligtas mo! O PANGINOON, ikaw ay magmadaling tulungan ako!

¹⁴Sila nawa'y mapahiya at hamaking sama-sama silang nagsisikap na agawin ang aking buhay; sila nawa'y mapaurong at madala sa kahihiyan, silang nagnanais ng aking kapahamakan.

¹⁵Matakot nawa sila dahil sa kanilang kahihiyan na nagsasabi sa akin, “Aha! Aha!”

¹⁶Ngunit magalak at matuwa nawa sa iyo ang lahat ng sa iyo'y nagsisihanap; yaong umiibig sa iyong pagliligtas ay patuloy nawang magsabi, “Dakilain ang PANGINOON!”

¹⁷Dahil sa ako'y nahihirapan at nangangailangan, alalahanin nawa ako ng Panginoon. Ikaw ang aking saklolo at aking tagapagligtas; huwag kang magtagal, O aking Diyos.