Read Ang Biblia, 2001 Mga Awit 45 Bible Online

Mga Awit 45 - Ang Biblia, 2001 bible

Mga Awit 45

¹Ang aking puso ay nag-uumapaw sa mabuting paksa, ipinatutungkol ko ang aking mga salita sa hari; ang aking dila ay gaya ng panulat ng bihasang manunulat.

²Ikaw ang pinakamaganda sa mga anak ng mga tao; ang biyaya ay ibinubuhos sa mga labi mo, kaya't pinagpala ka ng Diyos magpakailanman.

³Ibigkis mo ang iyong tabak sa iyong hita, O makapangyarihan, sa iyong kaluwalhatian at kamahalan!

⁴At sa iyong kamahalan ay sumakay kang nananagumpay para sa mga bagay ng katotohanan, at kaamuan at katuwiran; ang iyong kanang kamay nawa ay magturo sa iyo ng kakilakilabot na mga gawa!

⁵Ang iyong mga palaso ay matalas sa puso ng mga kaaway ng hari, ang mga bayan ay nabuwal sa ilalim mo.

⁶Ang iyong banal na trono ay magpakailanpaman. Ang iyong setro ng kaharian ay setro ng katarungan;

⁷iyong iniibig ang katuwiran at kinasusuklaman ang kasamaan. Kaya't ang Diyos, ang iyong Diyos, ay pinahiran ka ng langis, ng langis ng kagalakan na higit kaysa iyong mga kasamahan.

⁸Lahat ng iyong mga damit ay mabango dahil sa mira, mga aloe, at kasia. Mula sa palasyong garing ay pinasasaya ka ng mga panugtog na may kuwerdas.

⁹Ang mga anak na babae ng mga hari ay kabilang sa iyong mararangal na babae; sa iyong kanang kamay ay nakatayo ang reyna na may ginto ng Ofir.

¹⁰Pakinggan mo, O anak na babae, iyong isaalang-alang, at ikiling mo ang iyong pandinig, kalimutan mo ang iyong bayan at ang bahay ng iyong magulang;

¹¹at nanasain ng hari ang iyong ganda; yamang siya'y iyong panginoon, yumukod ka sa kanya.

¹²At ang anak na babae ng Tiro ay magsisikap na kunin ang iyong pagtatangi na may kaloob; at ang pinakamayaman sa mga bayan ay hahanap ng iyong kagandahang-loob.

¹³Ang anak na babae ng hari ay puspos ng kaluwalhatian sa loob niya, mga gintong hinabi ang kasuotang nasa kanya.

¹⁴Siya'y inihahatid sa hari na may kasuotang makulay, ang mga birhen, kanyang mga kasama na sumusunod sa kanya, ay dadalhin sa kanya.

¹⁵May kasayahan at kagalakan na inihahatid sila habang sila'y nagsisipasok sa palasyo ng hari.

¹⁶Sa halip ng iyong mga magulang ay ang iyong mga anak, gagawin mo silang mga pinuno sa buong lupa.

¹⁷Aking ipapaalala sa lahat ng salinlahi ang iyong pangalan, kaya't ang mga bayan ay magpapasalamat sa iyo magpakailanpaman.