Read Ang Biblia, 2001 Mga Awit 5 Bible Online

Mga Awit 5 - Ang Biblia, 2001 bible

Mga Awit 5

¹Dinggin mo ang aking mga salita, O PANGINOON, pakinggan mo ang aking panaghoy.

²Pakinggan mo ang tunog ng aking daing, hari ko at Diyos ko; sapagkat sa iyo ako'y nananalangin.

³O PANGINOON, sa umaga ang tinig ko'y iyong pinapakinggan; sa umaga'y naghahanda ako para sa iyo, at ako'y magbabantay.

⁴Sapagkat ikaw ay hindi isang Diyos na nalulugod sa kasamaan; ang kasamaan ay hindi mo kasamang naninirahan.

⁵Ang hambog ay hindi makakatayo sa iyong harapan, kinapopootan mo ang lahat ng mga gumagawa ng kasamaan.

⁶Iyong lilipulin sila na nagsasalita ng mga kasinungalingan; kinasusuklaman ng PANGINOON ang mamamatay-tao at manlilinlang.

⁷Ngunit ako, sa pamamagitan ng kasaganaan ng iyong wagas na pag-ibig, ay papasok sa iyong bahay; at sa iyo'y may takot na sasamba sa templo mong banal.

⁸Patnubayan mo ako, O PANGINOON, sa iyong katuwiran dahil sa aking mga kaaway; tuwirin mo ang iyong daan sa aking harapan.

⁹Sapagkat walang katotohanan sa kanilang bibig; ang kanilang puso ay pagkawasak, ang kanilang lalamunan ay isang bukas na libingan, sa pamamagitan ng kanilang dila ay nanlilinlang.

¹⁰O Diyos, ipapasan mo sa kanila ang kanilang pagkakasala, sa kanilang sariling mga balak ay hayaan mong mabuwal sila, dahil sa marami nilang mga pagsuway, sila'y iyong palayasin, sapagkat silang laban sa iyo ay suwail.

¹¹Ngunit hayaan mong magalak ang lahat ng nanganganlong sa iyo, hayaan mo silang umawit sa kagalakan at sila nawa'y ipagsanggalang mo, upang dakilain ka ng mga umiibig sa pangalan mo.

¹²O PANGINOON, sapagkat iyong pinagpapala ang tapat, na gaya ng isang kalasag ay tinatakpan mo siya ng paglingap.