Read Ang Biblia, 2001 Mga Awit 50 Bible Online

Mga Awit 50 - Ang Biblia, 2001 bible

Mga Awit 50

¹Ang Makapangyarihan, ang Diyos na PANGINOON, ay nagsalita at tinatawag ang lupa mula sa pagsikat ng araw hanggang sa paglubog niyon.

²Mula sa Zion na kasakdalan ng kagandahan, nagliliwanag ang Diyos.

³Ang aming Diyos ay dumarating at hindi siya tatahimik; nasa harapan niya ang apoy na tumutupok, at malakas na bagyo sa kanyang palibot.

⁴Siya'y tumatawag sa langit sa kaitaasan, at sa lupa upang hatulan niya ang kanyang bayan:

⁵“Tipunin mo sa akin ang aking mga banal, yaong nakipagtipan sa akin sa pamamagitan ng alay!”

⁶Ang langit ay nagpapahayag ng kanyang katuwiran; sapagkat ang Diyos ay siyang hukom! (Selah)

⁷“Makinig, O aking bayan, at magsasalita ako, O Israel, ako'y magpapatotoo laban sa iyo. Ako'y Diyos, Diyos mo.

⁸Hindi kita sinasaway dahil sa iyong mga handog; laging nasa harapan ko ang iyong mga handog na sinusunog.

⁹Hindi ako tatanggap ng baka mula sa iyong bahay, ni ng kambing na lalaki sa iyong mga kawan.

¹⁰Sapagkat bawat hayop sa gubat ay akin, ang hayop sa libong mga burol.

¹¹Nakikilala ko ang lahat ng mga ibon sa mga bundok; at ang lahat ng mga gumagala sa parang ay akin.

¹²“Kung ako'y gutom, sa iyo ay hindi ko sasabihin, sapagkat ang sanlibutan at ang lahat ng narito ay akin.

¹³Kumakain ba ako ng laman ng mga toro, o umiinom ng dugo ng mga kambing?

¹⁴Mag-alay sa Diyos ng pasasalamat na alay, at tuparin mo ang iyong mga panata sa Kataas-taasan;

¹⁵at tumawag ka sa akin sa araw ng kabagabagan; ililigtas kita, at luluwalhatiin mo ako.”

¹⁶Ngunit sa masama ay sinabi ng Diyos: “Anong karapatan mo upang ipahayag ang aking mga tuntunin, o ilagay ang aking tipan sa iyong bibig?

¹⁷Sapagkat ang disiplina ay kinapopootan mo, at iyong iwinawaksi ang aking mga salita sa likuran mo.

¹⁸Kapag nakakakita ka ng magnanakaw, ikaw ay natutuwa sa kanya, at sumasama ka sa mga mangangalunya.

¹⁹“Ibinibigay mo sa iyong bibig ang malayang paghahari ng kasamaan, at ang iyong dila ay kumakatha ng pandaraya.

²⁰Ikaw ay umuupo at nagsasalita laban sa iyong kapatid; iyong sinisiraan ang anak ng iyong sariling ina.

²¹Ang mga bagay na ito ay iyong ginawa, at ako'y nanahimik; iniisip mong ako'y gaya mo. Ngunit ngayo'y sinasaway kita, at ipinapataw ang paratang sa harapan mo.

²²“Kayong nakakalimot sa Diyos, tandaan ninyo ito, baka kayo'y aking pagluray-lurayin at walang magligtas sa inyo!

²³Ang naghahandog ng alay ng pasasalamat ay nagpaparangal sa akin; sa kanya na nag-aayos ng kanyang lakad ang pagliligtas ng Diyos ay ipapakita ko rin!”