Read Ang Biblia, 2001 Mga Awit 55 Bible Online

Mga Awit 55 - Ang Biblia, 2001 bible

Mga Awit 55

¹O Diyos, dalangin ko'y pakinggan mo, at huwag kang magtago sa daing ko!

²Pansinin mo ako, at sagutin mo ako; ako'y natatalo ng aking pagdaramdam. Ako'y walang katiwasayan sa aking pag-angal at ako'y dumadaing,

³dahil sa tinig ng kaaway, dahil sa pagmamalupit ng masama. Sapagkat nagdadala sila sa akin ng kaguluhan, at sa galit ay inuusig nila ako.

⁴Ang aking puso ay nagdaramdam sa loob ko, ang mga kilabot ng kamatayan ay bumagsak sa akin.

⁵Takot at panginginig ay dumating sa akin, at nadaig ako ng pagkatakot.

⁶At aking sinabi, “O kung ako sana'y nagkaroon ng mga pakpak na gaya ng kalapati! Lilipad ako at magpapahinga.

⁷Narito, kung magkagayo'y gagala ako sa malayo, sa ilang ay maninirahan ako. (Selah)

⁸Ako'y magmamadaling hahanap ng silungan ko, mula sa malakas na hangin at bagyo.”

⁹O Panginoon, guluhin mo, ang kanilang wika ay lituhin mo, sapagkat ang karahasan at pag-aaway sa lunsod ay nakikita ko.

¹⁰Sa araw at gabi ay lumiligid sila sa mga pader niyon; ang kasamaan at kahirapan ay nasa loob niyon.

¹¹Ang pagkawasak ay nasa gitna niyon; ang kalupitan at pandaraya ay hindi humihiwalay sa kanyang mga lansangan.

¹²Hindi isang kaaway ang tumutuya sa akin — mapagtitiisan ko iyon, hindi rin isang namumuhi sa akin ang nagmamalaki laban sa akin, sa gayo'y maitatago ang aking sarili sa kanya.

¹³Kundi ikaw, lalaki na kapantay ko, kaibigang matalik at kasama ko.

¹⁴Tayo ay dating magkasamang nag-uusap nang matamis; tayo'y lumalakad na magkasama sa loob ng bahay ng Diyos.

¹⁵Dumating nawang mapandaya ang kamatayan sa kanila, ibaba nawa silang buháy sa Sheol; sapagkat ang kasamaan ay nasa kanilang tahanan, sa gitna nila.

¹⁶Tungkol sa akin ay tatawag ako sa Diyos; at ililigtas ako ng PANGINOON.

¹⁷Sa hapon at umaga, at sa katanghaliang-tapat, ako'y dadaing at tataghoy, at diringgin niya ang aking tinig.

¹⁸Kanyang tutubusin ang aking kaluluwa sa kapayapaan, mula sa pakikibaka laban sa akin, sapagkat marami ang nagtitipon upang ako ay labanan.

¹⁹Papakinggan ng Diyos at sasagutin sila, siya na nakaupo sa trono mula pa noong una. (Selah) Sa kanya na walang pagbabago, at hindi natatakot sa Diyos.

²⁰Kanyang iniunat ang kanyang mga kamay laban sa mga taong nasa kapayapaan sa kanya, kanyang nilabag ang kanyang tipan.

²¹Higit na pino kaysa mantekilya ang kanyang pananalita, ngunit ang kanyang puso ay pakikidigma; higit na malambot kaysa langis ang kanyang mga salita, gayunman ang mga iyon ay nakaumang na mga tabak.

²²Iatang mo ang iyong pasan sa PANGINOON, at kanyang aalalayan ka; hindi niya pinahihintulutang makilos kailanman ang matuwid.

²³Ngunit ikaw, O Diyos, ihahagis mo sila sa hukay ng kapahamakan; ang mga taong mababagsik at mandaraya ay hindi mabubuhay sa kalahati ng kanilang mga araw. Ngunit magtitiwala ako sa iyo.