Read Ang Biblia, 2001 Mga Awit 56 Bible Online

Mga Awit 56 - Ang Biblia, 2001 bible

Mga Awit 56

¹ Maawa ka sa akin, O Diyos ko, sapagkat niyuyurakan ako ng mga tao; buong araw na pag-aaway, inaapi niya ako,

²sa buong araw ay niyuyurakan ako ng mga kaaway, sapagkat marami ang may kapalaluang sa akin ay lumalaban.

³Kapag natatakot ako, aking inilalagak ang tiwala ko sa iyo.

⁴Sa Diyos na pinupuri ko ang salita, sa Diyos ay inilagay ko ang aking tiwala, ang laman sa akin ay ano ang magagawa?

⁵Buong araw ay sinisikap nilang saktan ang aking kalagayan; lahat ng kanilang mga pag-iisip ay laban sa aking ikasasama.

⁶Sila'y nagsama-sama, sila'y nagsisipagkubli, binabantayan nila ang aking mga hakbang, gaya ng kanilang pag-aabang sa aking buhay.

⁷Kaya't gantihan mo sila sa kanilang kasamaan; sa galit ay ilugmok mo, O Diyos, ang mga bayan!

⁸Iyong ibinilang ang aking mga paglalakbay, ilagay mo ang aking mga luha sa botelya mo! Wala ba sila sa aklat mo?

⁹Kung magkagayo'y tatalikod ang aking mga kaaway sa araw na ako'y tumawag. Ito'y nalalaman ko, sapagkat ang Diyos ay kakampi ko.

¹⁰Sa Diyos, na ang mga salita ay aking pinupuri, sa PANGINOON, na ang mga salita ay aking pinupuri,

¹¹sa Diyos ay walang takot na nagtitiwala ako. Anong magagawa sa akin ng tao?

¹²Ang iyong mga panata ay sa akin, O Diyos, ako'y mag-aalay ng mga handog ng pasasalamat sa iyo.

¹³Sapagkat iniligtas mo sa kamatayan ang aking kaluluwa, at sa pagkahulog ang aking mga paa, upang ako'y makalakad sa harapan ng Diyos sa liwanag ng buhay.