Read Ang Biblia, 2001 Mga Awit 58 Bible Online

Mga Awit 58 - Ang Biblia, 2001 bible

Mga Awit 58

¹Tunay bang kayo'y nagsasalita nang matuwid, kayong mga diyos? Matuwid ba kayong humahatol, O kayong mga anak ng tao?

²Hindi, sa inyong mga puso ay nagsisigawa kayo ng kamalian; sa lupa ang karahasan ng inyong mga kamay ay inyong tinitimbang.

³Ang masama ay naliligaw mula sa bahay-bata, silang nagsasalita ng mga kasinungalingan ay naliligaw mula sa pagkapanganak.

⁴Sila'y may kamandag na gaya ng kamandag ng ahas, gaya ng binging ahas na nagtatakip ng kanyang pandinig,

⁵kaya't hindi nito naririnig ang tinig ng mga engkantador, ni ang tusong manggagayuma.

⁶O Diyos, basagin mo ang mga ngipin sa kanilang mga bibig; tanggalin mo ang mga pangil ng mga batang leon, O PANGINOON!

⁷Parang tubig na papalayong umaagos ay maglaho nawa sila, kapag iniumang na niya ang kanyang mga palaso, maging gaya nawa sila ng mga pirasong naputol.

⁸Maging gaya nawa ng kuhol na natutunaw habang nagpapatuloy, gaya ng wala sa panahong panganganak na hindi nakakita ng araw kailanman.

⁹Bago makaramdam ang inyong mga palayok sa init ng dawag, kanyang kukunin ang mga iyon ng ipu-ipo ang sariwa at gayundin ang nagniningas.

¹⁰Magagalak ang matuwid kapag nakita niya ang paghihiganti; kanyang huhugasan ang kanyang mga paa ng dugo ng masama.

¹¹Sasabihin ng mga tao, “Tiyak na sa matuwid ay may gantimpala, tiyak na may Diyos na humahatol sa lupa.”