Read Ang Biblia, 2001 Mga Awit 61 Bible Online

Mga Awit 61 - Ang Biblia, 2001 bible

Mga Awit 61

¹Pakinggan mo, O Diyos, ang aking daing, dinggin mo ang aking dalangin.

²Mula sa dulo ng lupa ay tumatawag ako sa iyo, kapag nanlulupaypay ang aking puso. Ihatid mo ako sa bato na higit na mataas kaysa akin;

³sapagkat ikaw ay aking kanlungan, isang matibay na muog laban sa kaaway.

⁴Patirahin mo ako sa iyong tolda magpakailanman! Ako'y manganganlong sa lilim ng iyong mga pakpak! (Selah)

⁵Sapagkat ang aking mga panata, O Diyos, ay iyong pinakinggan, ibinigay mo sa akin ang pamana ng mga may takot sa iyong pangalan.

⁶Pahabain mo ang buhay ng hari; tumagal nawa ang kanyang mga taon hanggang sa lahat ng mga salinlahi!

⁷Siya nawa'y maluklok sa trono sa harapan ng Diyos magpakailanman; italaga mong bantayan siya ng wagas na pag-ibig at katapatan!

⁸Sa gayon ako'y aawit ng mga papuri sa iyong pangalan magpakailanman, habang tinutupad ko ang aking mga panata araw-araw.