Read Ang Biblia, 2001 Mga Awit 62 Bible Online

Mga Awit 62 - Ang Biblia, 2001 bible

Mga Awit 62

¹Sa Diyos lamang naghihintay nang tahimik ang aking kaluluwa; ang aking kaligtasan ay nanggagaling sa kanya.

²Siya lamang ang aking malaking bato at aking kaligtasan, ang aking muog; hindi ako lubhang matitinag.

³Hanggang kailan kayo magtatangka laban sa isang tao, upang patayin siya, ninyong lahat, gaya ng pader na nakahilig, o bakod na nabubuwal?

⁴Sila'y nagbabalak lamang upang ibagsak siya sa kanyang kadakilaan. Sila'y nasisiyahan sa mga kasinungalingan. Sila'y nagpupuri ng bibig nila, ngunit sa kalooban sila'y nanunumpa. (Selah)

⁵Sa Diyos lamang naghihintay nang tahimik ang aking kaluluwa, sapagkat ang aking pag-asa ay mula sa kanya.

⁶Siya lamang ang aking malaking bato at aking kaligtasan, ang aking muog, hindi ako mayayanig.

⁷Nasa Diyos ang aking kaligtasan at aking karangalan; ang aking makapangyarihang bato, ang Diyos ang aking kanlungan.

⁸Magtiwala kayo sa kanya sa lahat ng panahon, O bayan; ibuhos ninyo ang inyong puso sa kanyang harapan; para sa atin, ang Diyos ay kanlungan. (Selah)

⁹Tunay na walang kabuluhan ang mga taong may mababang kalagayan, ang mga taong may mataas na kalagayan ay kasinungalingan; sumasampa sila sa mga timbangan; silang magkakasama ay higit na magaan kaysa hininga.

¹⁰Sa pangingikil ay huwag kang magtiwala, sa walang kabuluhang pagnanakaw ay huwag kang umasa; kung ang mga kayamanan ay lumago, huwag ninyong ilagak doon ang inyong puso.

¹¹Ang Diyos ay nagsalitang minsan, dalawang ulit kong narinig ito: na ang kapangyarihan ay sa Diyos;

¹²at sa iyo, O Panginoon, ang tapat na pag-ibig, sapagkat ginagantihan mo ang tao ayon sa kanyang gawa.