Read Ang Biblia, 2001 Mga Awit 66 Bible Online

Mga Awit 66 - Ang Biblia, 2001 bible

Mga Awit 66

¹Magkaingay kayong may kagalakan sa Diyos, buong lupa;

²awitin ninyo ang kaluwalhatian ng kanyang pangalan; gawin ninyong maluwalhati ang pagpupuri sa kanya!

³Inyong sabihin sa Diyos, “Kakilakilabot ang iyong mga gawa! Dahil sa kadakilaan ng iyong kapangyarihan, ang iyong kaaway ay pakunwaring susunod sa iyo.

⁴Sasamba sa iyo ang buong mundo; aawit sila ng papuri sa iyo, aawit ng mga papuri sa pangalan mo.” (Selah)

⁵Halikayo at tingnan ang ginawa ng Diyos: siya'y kakilakilabot sa kanyang mga gawa sa gitna ng mga tao.

⁶Kanyang ginawang tuyong lupa ang dagat; ang mga tao'y tumawid sa ilog nang naglalakad. Doon ay nagalak kami sa kanya,

⁷siya'y namumuno sa pamamagitan ng kanyang kapangyarihan magpakailanman; ang kanyang mga mata ay nagbabantay sa mga bansa — huwag itaas ng mga mapaghimagsik ang mga sarili nila. (Selah)

⁸O purihin ninyo ang aming Diyos, kayong mga bayan, ang tinig ng pagpupuri sa kanya ay hayaang mapakinggan,

⁹na umaalalay sa amin kasama ng mga buháy, at hindi hinayaang madulas ang aming mga paa.

¹⁰Sapagkat ikaw, O Diyos, ang sumubok sa amin; sinubok mo kami na gaya ng pagsubok sa pilak.

¹¹Iyong inilagay kami sa lambat; nilagyan mo ng malupit na pasan ang aming mga balikat.

¹²Hinayaan mong sakyan ng mga tao ang aming mga ulo; kami ay dumaan sa apoy at sa tubig; at dinala mo kami sa kasaganaan.

¹³Ako'y papasok sa iyong bahay na may dalang mga handog na susunugin, ang mga panata ko sa iyo ay aking tutuparin,

¹⁴na sinambit ng aking mga labi, at ipinangako ng aking bibig, nang ako ay nasa pagkaligalig.

¹⁵Hahandugan kita ng mga handog na sinusunog na mga pinataba, na may usok ng handog na tupa; ako'y maghahandog ng mga toro at mga kambing. (Selah)

¹⁶Kayo'y magsiparito at inyong dinggin, kayong lahat na natatakot sa Diyos, at ipahahayag ko kung ano ang kanyang ginawa para sa aking kaluluwa.

¹⁷Ako'y dumaing sa kanya ng aking bibig, at siya'y pinuri ng aking dila.

¹⁸Kung iningatan ko ang kasamaan sa aking puso, ang Panginoon ay hindi makikinig.

¹⁹Ngunit tunay na nakinig ang Diyos; kanyang dininig ang tinig ng aking panalangin.

²⁰Purihin ang Diyos, sapagkat hindi niya tinanggihan ang aking panalangin ni inalis ang kanyang tapat na pag-ibig sa akin!