Read Ang Biblia, 2001 Mga Awit 68 Bible Online

Mga Awit 68 - Ang Biblia, 2001 bible

Mga Awit 68

¹Bumangon nawa ang Diyos, mangalat nawa ang mga kaaway niya; tumakas nawa sa harapan niya ang mga napopoot sa kanya!

²Kung paanong itinataboy ang usok, ay gayon mo sila itaboy; kung paanong natutunaw ang pagkit sa harap ng apoy, gayon nawa mamatay ang masama sa harapan ng Diyos.

³Ngunit matuwa nawa ang matuwid; magalak nawa sila sa harapan ng Diyos; oo, magalak nawa sila sa kasayahan!

⁴Kayo'y magsiawit sa Diyos, umawit ng mga papuri sa kanyang pangalan; magtaas ng isang awit sa kanya, siya na nangangabayo sa mga ilang; PANGINOON ang kanyang pangalan, magalak kayo sa kanyang harapan.

⁵Ama ng mga ulila, at tagapagtanggol ng mga babaing balo, ang Diyos na sa kanyang banal na tirahan.

⁶Ang nag-iisa ay binibigyan ng Diyos ng tahanan, kanyang inaakay ang mga bilanggo sa kasaganaan, ngunit ang mga mapaghimagsik sa tigang na lupa ay naninirahan.

⁷O Diyos, nang humayo ka sa harapan ng iyong bayan, nang lumakad ka sa ilang, (Selah)

⁸ang lupa ay nayanig, ang kalangitan ay nagbuhos ng ulan sa harapan ng Diyos; ang Sinai ay nayanig sa harapan ng Diyos, ang Diyos ng Israel.

⁹Ikaw, O Diyos, ay nagbigay ng saganang ulan, iyong pinalakas ang iyong mana, nang ito'y manghina.

¹⁰Ang iyong kawan doon ay nakatagpo ng tirahan, sa iyong kabutihan, O Diyos, ikaw ay nagkaloob para sa nangangailangan.

¹¹Ang Panginoon ang nagbibigay ng utos; malaki ang hukbo ng mga babaing naghahayag ng balita:

¹²“Ang mga hari ng mga hukbo, tumatakas sila, tumatakas sila!” Pinaghatian ang samsam ng mga babaing nasa tahanan,

¹³kapag kayo'y humiga sa gitna ng mga kulungan ng mga kawan, kayo ay parang mga pakpak ng kalapati na natatakpan ng pilak, ang kanyang balahibo ay gintong kumikinang.

¹⁴Nang ikalat ng Makapangyarihan ang mga hari roon, ang niyebe ay bumagsak sa Zalmon.

¹⁵Bundok ng Diyos ay bundok ng Basan; bundok na maraming taluktok ay ang bundok ng Basan!

¹⁶Bakit kayo'y nakatinging may pagkainggit, kayong mga bundok na maraming taluktok, sa bundok na ninais ng Diyos para sa kanyang tahanan, oo, doon titira ang PANGINOON magpakailanman.

¹⁷Ang mga karo ng Diyos ay dalawampung libo, samakatuwid ay libu-libo. Ang PANGINOON ay dumating mula sa Sinai patungo sa banal na lugar.

¹⁸Sumampa ka sa mataas, pinatnubayan mo ang iyong bihag sa pagkabihag; tumanggap ka ng mga kaloob sa gitna ng mga tao, oo, pati sa mga mapanghimagsik, upang makatahang kasama nila ang Panginoong DIYOS.

¹⁹Purihin ang Panginoon na nagpapasan araw-araw ng aming pasan, samakatuwid baga'y ang Diyos na siyang aming kaligtasan. (Selah)

²⁰Ang Diyos sa amin ay Diyos ng kaligtasan; at sa DIYOS, na Panginoon, sa kanya ang pagtakas mula sa kamatayan.

²¹Ngunit babasagin ng Diyos ang mga ulo ng kanyang mga kaaway, ang mabuhok na ulo ng lumalakad sa kanyang makasalanang mga daan.

²²Sinabi ng Panginoon, “Ibabalik ko sila mula sa Basan, ibabalik ko sila mula sa mga kalaliman ng karagatan,

²³upang sa dugo, ang mga paa mo'y iyong mapaliguan, upang ang dila ng iyong mga aso ay magkaroon ng bahagi mula sa iyong mga kaaway.”

²⁴Nakita nila ang iyong mga lakad, O Diyos, ang mga paglakad ng aking Diyos, ng Hari ko, patungo sa santuwaryo —

²⁵ang mga mang-aawit ay nasa unahan, ang mga manunugtog ay nasa hulihan, sa pagitan nila ay ang tumutugtog ng mga pandereta na mga kadalagahan:

²⁶“Purihin ninyo ang Diyos sa malaking kapulungan, ang PANGINOON, kayong mga mula sa bukal ng Israel!”

²⁷Naroon si Benjamin, ang pinakamaliit sa kanila, na siyang nangunguna, ang mga pinuno ng Juda at ang kanilang pangkat, ang mga pinuno ng Zebulon, ang mga pinuno ng Neftali.

²⁸Utusan mo, O Diyos, ang iyong kalakasan, ipakita mong malakas ang iyong sarili, O Diyos, tulad ng ginawa mo para sa amin.

²⁹Dahil sa iyong templo sa Jerusalem ang mga hari ay nagdadala ng mga handog sa iyo.

³⁰Sawayin mo ang maiilap na hayop na sa mga tambo naninirahan, ang kawan ng mga toro na kasama ng mga guya ng mga bayan. Yapakan mo sa ilalim ng paa ang mga piraso ng pilak, pangalatin mo ang mga taong sa digmaan ay natutuwa.

³¹Mga sugo ay lalabas mula sa Ehipto; magmamadali nawa ang Etiopia na iabot sa Diyos ang mga kamay nito.

³²Magsiawit kayo sa Diyos, mga kaharian sa lupa; magsiawit kayo ng mga papuri sa Panginoon, (Selah)

³³sa kanya na sumasakay sa langit ng mga langit, na mula pa nang una, narito, binibigkas niya ang kanyang tinig, ang kanyang makapangyarihang tinig.

³⁴Iukol ninyo sa Diyos ang kalakasan, na nasa Israel ang kanyang kadakilaan, at nasa mga langit ang kanyang kalakasan.

³⁵O Diyos, ikaw ay kakilakilabot mula sa iyong santuwaryo, ang Diyos ng Israel, nagbibigay siya ng kapangyarihan at lakas sa kanyang bayan. Purihin ang Diyos!