Read Ang Biblia, 2001 Mga Awit 69 Bible Online

Mga Awit 69 - Ang Biblia, 2001 bible

Mga Awit 69

¹O Diyos! Ako'y iyong sagipin! Sapagkat ang tubig hanggang sa aking kaluluwa ay nakarating.

²Ako'y lumulubog sa malalim na putikan, ang mga paa ay walang tuntungan; ako'y dumating sa tubig na malalim, at ang baha ay tumatangay sa akin.

³Ako'y pagod na sa pagdaing ko; ang lalamunan ko ay nanuyo. Ang mga mata ko'y lumalabo sa kahihintay sa aking Diyos.

⁴Higit kaysa mga buhok ng aking ulo ang bilang ng mga namumuhi sa akin ng walang kadahilanan; ang mga nais pumuksa sa akin ay makapangyarihan na mga kaaway kong may kamalian. Anumang hindi ko naman ninakaw ay dapat kong isauli.

⁵O Diyos, nalalaman mo ang kahangalan ko; ang mga pagkakamaling nagawa ko'y hindi lingid sa iyo.

⁶Huwag nawang mapahiya dahil sa akin ang mga umaasa sa iyo, O Panginoong DIYOS ng mga hukbo; huwag nawang malagay sa kasiraang-puri dahil sa akin ang mga nagsisihanap sa iyo, O Diyos ng Israel.

⁷Sapagkat alang-alang sa iyo ay nagbata ako ng kasiraan, at tumakip sa aking mukha ang kahihiyan.

⁸Sa aking mga kapatid ako'y naging isang dayuhan, sa mga anak ng aking ina ay isang taga-ibang bayan.

⁹Sapagkat ang pagmamalasakit sa iyong bahay ang sa aki'y umubos, at ang mga paghamak ng mga sa iyo'y humahamak sa akin ay nahulog.

¹⁰Nang umiyak ako sa aking kaluluwa na may pag-aayuno, iyon ay naging kahihiyan ko.

¹¹Nang magsuot ako ng damit-sako, naging bukambibig nila ako.

¹²Ang mga umuupo sa pintuang-bayan, ang pinag-uusapan ay ako, at ako ang awit ng mga lasenggo.

¹³Ngunit para sa akin, ang dalangin ko'y sa iyo, O PANGINOON, sa isang kaaya-ayang panahon, O Diyos, sa kasaganaan ng iyong tapat na pag-ibig, sagutin mo ako. Sa pamamagitan ng iyong tapat na tulong,

¹⁴sagipin mo ako sa paglubog sa putikan, at huwag mo akong hayaang lumubog; iligtas mo ako sa aking mga kaaway mula sa tubig na may kalaliman.

¹⁵Ang baha nawa'y huwag akong tangayin, ni ng kalaliman ako man ay lamunin, ni isara ng Hukay ang kanyang bunganga sa akin.

¹⁶O PANGINOON, ako'y iyong sagutin, sapagkat ang iyong tapat na pag-ibig ay mabuti; ayon sa iyong masaganang awa, bumalik ka sa akin.

¹⁷Huwag mong ikubli ang iyong mukha sa iyong lingkod; sapagkat ako'y nasa kahirapan, magmadali kang sa aki'y sumagot.

¹⁸O lumapit ka sa aking kaluluwa, at ako'y iyong tubusin, dahil sa aking mga kaaway ako'y iyong palayain!

¹⁹Nalalaman mo ang aking kasiraan, ang aking kahihiyan at aking kakutyaan; lahat ng aking mga kaaway ay nasa harapan mo.

²⁰Ang mga paghamak sa aking puso ay sumira; kaya't ako'y may sakit. Ako'y naghanap ng habag, ngunit wala naman; at ng mga mang-aaliw, ngunit wala akong natagpuan.

²¹Binigyan nila ako ng lason bilang pagkain, at sa aking uhaw ay binigyan nila ako ng sukang iinumin.

²²Ang kanila nawang sariling hapag na nasa harapan nila ay maging isang bitag; kung sila'y nasa kapayapaan, ito nawa'y maging isang patibong.

²³Lumabo nawa ang kanilang mga mata, upang sila'y huwag makakita; at papanginigin mo ang kanilang mga balakang sa tuwina.

²⁴Ibuhos mo sa kanila ang iyong poot, at ang iyong nag-aalab na galit sa kanila nawa'y umabot.

²⁵Ang kanilang kampo nawa'y maging mapanglaw; sa kanilang mga tolda wala sanang tumahan.

²⁶Sapagkat kanilang inuusig siya na iyong hinataw, at isinaysay nila ang sakit nila na iyong sinugatan.

²⁷Dagdagan mo ng kasamaan ang kanilang kasamaan; at huwag nawa silang dumating sa iyong katuwiran.

²⁸Mapawi nawa sila sa aklat ng mga nabubuhay, huwag nawa silang makasama ng matuwid sa talaan.

²⁹Ngunit ako'y nagdadalamhati at nasasaktan, ang iyo nawang pagliligtas, O Diyos, ang magtaas sa akin!

³⁰Sa pamamagitan ng awit ang pangalan ng Diyos ay aking pupurihin, at sa pasasalamat siya'y aking dadakilain.

³¹Ito'y makakalugod sa PANGINOON ng higit kaysa baka, o sa toro na may mga sungay at mga paa.

³²Nakita ito ng mapagkumbaba at sila'y natuwa, ikaw na naghahanap sa Diyos, ang puso mo'y muling mabuhay nawa.

³³Sapagkat dinirinig ng PANGINOON ang kinakapos, at hindi hinahamak ang sariling kanya na nakagapos.

³⁴Purihin nawa siya ng langit at ng lupa, ng mga dagat, at ng lahat ng gumagalaw roon.

³⁵Sapagkat ililigtas ng Diyos ang Zion, at muling itatayo ang mga lunsod ng Juda; at ang mga lingkod niya ay maninirahan doon, at aangkinin iyon;

³⁶ang mga anak ng kanyang mga lingkod ang magmamana niyon, at silang umiibig sa kanyang pangalan ay maninirahan doon.