Read Ang Biblia, 2001 Mga Awit 72 Bible Online

Mga Awit 72 - Ang Biblia, 2001 bible

Mga Awit 72

¹Ibigay mo, O Diyos, sa hari ang iyong mga katarungan, at sa anak ng hari, ang iyong katuwiran.

²Nawa'y hatulan niya na may katuwiran ang iyong bayan, at ang iyong dukha ng may katarungan!

³Ang mga bundok nawa'y magtaglay ng kasaganaan para sa bayan, at ang mga burol, sa katuwiran!

⁴Kanya nawang ipagtanggol ang dukha ng bayan, magbigay ng kaligtasan sa mga nangangailangan, at ang mapang-api ay kanyang durugin!

⁵Sila nawa'y matakot sa iyo habang ang araw ay nananatili, at kasintagal ng buwan, sa buong panahon ng mga salinlahi!

⁶Siya nawa'y maging gaya ng ulan na bumabagsak sa damong tinabas, gaya ng ambon na dumidilig sa lupa.

⁷Sa kanyang mga araw nawa'y lumaganap ang matuwid, at ang kapayapaan ay sumagana, hanggang sa mawala ang buwan.

⁸Magkaroon nawa siya ng kapangyarihan mula sa dagat hanggang sa kabilang dagat, at mula sa Ilog hanggang sa mga dulo ng lupa!

⁹Ang mga naninirahan sa ilang nawa sa kanya ay magsiyukod, at himuran ng kanyang mga kaaway ang alabok!

¹⁰Ang mga hari nawa ng Tarsis at ng mga pulo ay magdala sa kanya ng mga kaloob; ang mga hari nawa sa Sheba at Seba ay magdala ng mga kaloob!

¹¹Lahat nawa ng mga hari ay magsiyukod sa harap niya, lahat ng mga bansa ay maglingkod sa kanya!

¹²Sapagkat kanyang inililigtas ang nangangailangan kapag ito'y nananawagan, ang dukha at ang taong walang kadamay.

¹³Siya'y maaawa sa mahina at nangangailangan, at ililigtas ang buhay ng mga nangangailangan.

¹⁴Sa panggigipit at karahasan, buhay nila'y kanyang tutubusin; at magiging mahalaga ang kanilang dugo sa kanyang paningin.

¹⁵Mabuhay nawa siya nang matagal, at ang ginto ng Sheba sa kanya nawa'y ibigay! Ipanalangin nawa siyang palagian, at hingin ang mga pagpapala para sa kanya sa buong araw!

¹⁶Magkaroon nawa ng saganang trigo sa lupa; sa mga tuktok ng mga bundok ito nawa'y umalon; ang bunga nawa niyon ay wawagayway gaya ng Lebanon; at silang mga nasa lunsod nawa ay sumagana, gaya ng damo sa lupa.

¹⁷Ang kanyang pangalan nawa ay manatili kailanman; ang kanyang pangalan nawa ay maging bantog hanggang ang araw ay sumikat! Ang mga tao nawa ay pagpalain sa pamamagitan niya, at tawagin siyang mapalad ng lahat ng mga bansa.

¹⁸Purihin ang PANGINOON, ang Diyos ng Israel, na siya lamang ang gumagawa ng mga bagay na kahanga-hanga.

¹⁹Purihin ang kanyang maluwalhating pangalan magpakailanman; mapuno nawa ang buong lupa ng kanyang kaluwalhatian. Amen at Amen.

²⁰Ang mga panalangin ni David, na anak ni Jesse ay dito natapos.