Read Ang Biblia, 2001 Mga Awit 75 Bible Online

Mga Awit 75 - Ang Biblia, 2001 bible

Mga Awit 75

¹Kami ay nagpapasalamat sa iyo, O Diyos; kami ay nagpapasalamat, malapit ang iyong pangalan. Ang mga kagila-gilalas mong gawa ay sinasaysay ng mamamayan.

²At sa aking piniling takdang panahon, may katarungan akong hahatol.

³Kapag ang lupa ay nayayanig at ang lahat ng mga naninirahan dito, ako ang nagpapatatag sa mga haligi nito. (Selah)

⁴Aking sinabi sa hambog, “Huwag kang magyabang,” at sa masama, “Huwag mong itaas ang iyong sungay;

⁵huwag mong itaas ang iyong sungay nang mataas, huwag kang magsalita nang may matigas na ulo.”

⁶Sapagkat hindi mula sa silangan, o mula sa kanluran, ni mula man sa ilang ang pagkataas;

⁷kundi ang Diyos ang hukom, ang isa'y ibinababa at ang iba'y itinataas naman.

⁸Sapagkat sa kamay ng PANGINOON ay may isang kopa, may alak na bumubula, hinalong totoo; at kanyang ibubuhos ang laman nito, tunay na ang masasama sa lupa ay ibubuhos at iinumin ang latak nito.

⁹Ngunit ako'y magpapahayag magpakailanman, ako'y aawit ng mga papuri sa Diyos ni Jacob.

¹⁰Lahat ng mga sungay ng masama ay aking puputulin, ngunit ang mga sungay ng matuwid ay itataas.