Read Ang Biblia, 2001 Mga Awit 79 Bible Online

Mga Awit 79 - Ang Biblia, 2001 bible

Mga Awit 79

¹O Diyos, ang mga pagano sa iyong mana ay dumating, kanilang dinungisan ang iyong templong banal; ang Jerusalem sa mga guho ay kanilang inilagay.

²Ang mga katawan ng iyong mga lingkod ay ibinigay nila bilang pagkain sa mga ibon sa himpapawid, ang laman ng iyong mga banal sa mga hayop sa lupa.

³Ang kanilang dugo ay parang tubig na ibinuhos nila sa palibot ng Jerusalem; at walang sinumang sa kanila'y maglibing.

⁴Kami'y naging tampulan ng pagtuya sa aming mga kalapit, ang mga nasa palibot namin kami'y nililibak at nilalait.

⁵Hanggang kailan, O PANGINOON? Magagalit ka ba habang panahon? Ang iyo bang mapanibughong poot ay mag-aalab na parang apoy?

⁶Ibuhos mo ang iyong galit sa mga bansang hindi kumikilala sa iyo, at sa mga kaharian na hindi tumatawag sa pangalan mo!

⁷Sapagkat ang Jacob ay kanilang nilapa, at ang kanyang tahanan ay kanilang giniba.

⁸Huwag mong alalahanin laban sa amin ang kasamaan ng aming mga ninuno, mabilis nawang dumating ang iyong kahabagan upang salubungin kami, sapagkat kami ay lubhang pinababa.

⁹Tulungan mo kami, O Diyos ng aming kaligtasan, para sa kaluwalhatian ng iyong pangalan; iligtas mo kami at patawarin ang aming mga kasalanan, alang-alang sa iyong pangalan.

¹⁰Bakit sasabihin ng mga bansa, “Nasaan ang kanilang Diyos?” Nawa'y ang paghihiganti para sa dugong nabuhos ng iyong mga lingkod ay malaman ng mga bansa sa harap ng aming mga mata.

¹¹Ang daing ng mga bilanggo'y dumating nawa sa iyong harapan, ayon sa iyong dakilang kapangyarihan iligtas mo ang mga nakatakdang mamatay!

¹²Ibalik mo ng pitong ulit sa sinapupunan ng aming mga kalapit-bansa ang mga pagkutyang ikinutya nila sa iyo, O Panginoon.

¹³Kung gayon kaming iyong bayan, ang mga tupa sa iyong pastulan, ay magpapasalamat sa iyo magpakailanman; sa lahat ng salinlahi ang papuri sa iyo'y aming isasalaysay.