Read Ang Biblia, 2001 Mga Awit 84 Bible Online

Mga Awit 84 - Ang Biblia, 2001 bible

Mga Awit 84

¹Napakaganda ng tahanan mo, O PANGINOON ng mga hukbo!

²Ang kaluluwa ko'y nananabik, oo, nanghihina para sa mga bulwagan ng PANGINOON; ang puso ko't laman ay umaawit sa kagalakan sa buháy na Diyos.

³Maging ang maya ay nakakatagpo ng bahay, at ang layang-layang ay ng pugad para sa kanya, na mapaglalagyan niya ng kanyang inakay, O PANGINOON ng mga hukbo, sa mga dambana mo, Hari ko, at Diyos ko.

⁴Mapalad silang naninirahan sa bahay mo, na laging umaawit ng pagpupuri sa iyo! (Selah)

⁵Mapalad ang mga tao na ang mga kalakasan ay nasa iyo; na ang mga daan tungo sa Zion ay nasa kanilang puso.

⁶Sa kanilang pagdaan sa libis ng Baca, ay ginawa nila itong dako ng mga bukal; kinakalatan din ito ng mga pagpapala ng maagang ulan.

⁷Sila'y humahayo sa lakas at lakas, ang Diyos ng mga diyos ay makikita sa Zion.

⁸O PANGINOONG Diyos ng mga hukbo, pakinggan mo ang aking panalangin, pakinggan mo, O Diyos ni Jacob. (Selah)

⁹Masdan mo ang aming kalasag, O Diyos, tingnan mo ang mukha ng iyong pinahiran ng langis!

¹⁰Sapagkat ang isang araw sa iyong mga bulwagan ay mabuti kaysa isang libo saanman. Nanaisin ko pang maging tanod sa pintuan sa bahay ng aking Diyos, kaysa tumahan sa mga tolda ng kasamaan.

¹¹Sapagkat ang PANGINOONG Diyos ay araw at kalasag, siya'y nagbibigay ng biyaya at karangalan. Walang mabuting bagay ang ipagkakait ng PANGINOON sa mga nagsisilakad nang matuwid.

¹²O PANGINOON ng mga hukbo, mapalad ang taong nagtitiwala sa iyo!