Read Ang Biblia, 2001 Mga Awit 9 Bible Online

Mga Awit 9 - Ang Biblia, 2001 bible

Mga Awit 9

¹Ako'y magpapasalamat sa PANGINOON ng buong puso ko; aking sasabihin sa lahat ang kahanga-hangang mga gawa mo.

²Ako'y magagalak at magsasaya sa iyo. O Kataas-taasan, ako'y aawit ng pagpuri sa pangalan mo.

³Nang magsibalik ang mga kaaway ko, sila'y natisod at nalipol sa harapan mo.

⁴Sapagkat iyong pinanatili ang matuwid na usapin ko, ikaw ay naggagawad ng matuwid na hatol habang nakaupo sa trono.

⁵Iyong sinaway ang mga bansa, nilipol mo ang masama, pinawi mo ang kanilang pangalan magpakailanman.

⁶Ang kaaway ay naglaho sa walang hanggang pagkawasak; ang kanilang mga lunsod ay binunot mo, ang tanging alaala nila ay naglaho.

⁷Ngunit nakaupong hari magpakailanman ang PANGINOON, itinatag niya ang kanyang trono para sa paghatol;

⁸at hinahatulan niyang may katarungan ang sanlibutan, at ang mga tao'y pantay-pantay niyang hinahatulan.

⁹Ang muog para sa naaapi ay ang PANGINOON, isang muog sa magugulong panahon.

¹⁰At silang nakakakilala ng iyong pangalan ay magtitiwala sa iyo; sapagkat ikaw, O PANGINOON, ay hindi nagpabaya sa mga naghahanap sa iyo.

¹¹Magsiawit kayo ng mga pagpuri sa PANGINOON, sa mga nagsisitahan sa Zion! Ipahayag ninyo sa mga bansa ang kanyang mga gawa!

¹²Sapagkat siya na naghihiganti ng dugo ay inaalala sila; hindi niya kinalilimutan ang daing ng nagdurusa.

¹³O PANGINOON! Kahabagan mo ako, mula sa kanila na napopoot sa akin, ang tinitiis ko'y masdan mo. Yamang mula sa mga pintuan ng kamatayan, ako ay itinaas mo,

¹⁴upang aking maisaysay ang lahat ng kapurihan mo, upang sa mga pintuan ng anak na babae ng Zion, ay ikagalak ko ang pagliligtas mo.

¹⁵Nahulog ang mga bansa, sa hukay na kanilang ginawa; sa lambat na kanilang ikinubli, sarili nilang mga paa ang nahuli.

¹⁶Ipinakilala ng PANGINOON ang sarili niya, siya'y naglapat ng pasiya; ang masama ay nasilo sa mga gawa ng kanilang sariling mga kamay. (Higgaion. Selah)

¹⁷Babalik sa Sheol ang masama ang lumilimot sa Diyos sa lahat ng mga bansa.

¹⁸Sapagkat ang nangangailangan ay hindi laging malilimutan, at ang pag-asa ng dukha ay hindi mapapawi magpakailanman.

¹⁹Bumangon ka, O PANGINOON; huwag papanaigin ang tao; hatulan mo ang mga bansa sa harapan mo!

²⁰Ilagay mo sila sa pagkatakot, O PANGINOON! Ipaalam mo sa mga bansa na sila'y mga tao lamang! (Selah)