Read Ang Biblia, 2001 Mga Awit 94 Bible Online

Mga Awit 94 - Ang Biblia, 2001 bible

Mga Awit 94

¹O PANGINOON, ikaw na Diyos ng paghihiganti, ikaw na Diyos ng paghihiganti, magningning ka.

²Bumangon ka, ikaw na hukom ng lupa, ibigay mo sa palalo ang nararapat sa kanila.

³O PANGINOON, hanggang kailan ang masama, hanggang kailan magsasaya ang masama?

⁴Ibinubuhos nila ang kanilang mga salita, nang may kayabangan, lahat ng gumagawa ng kasamaan ay nagmamalaki.

⁵O PANGINOON, kanilang dinurog ang iyong bayan, at ang iyong mana ay sinaktan.

⁶Kanilang pinatay ang balo at ang dayuhan, ang ulila ay kanilang pinatay.

⁷At kanilang sinasabi, “Hindi nakikita ng PANGINOON, ni hindi pinapansin ng Diyos ni Jacob.”

⁸Unawain ninyo, kayong mga hangal sa gitna ng bayan! Kailan kayo magiging matatalino, mga hangal?

⁹Siyang naglagay ng pandinig, hindi ba siya nakakarinig? Siyang lumikha ng mata, hindi ba siya makakakita?

¹⁰Siyang sumusupil sa mga bansa, hindi ba siya'y nagpaparusa, siya na nagtuturo ng kaalaman?

¹¹Ang mga pag-iisip ng tao ay ang PANGINOON ang nakakaalam, sila'y gaya lamang ng hiningang walang laman.

¹²O PANGINOON, mapalad ang tao na iyong sinusupil, at tinuturuan ng iyong kautusan,

¹³upang mabigyan siya ng kapahingahan mula sa mga araw ng kaguluhan, hanggang ang hukay para sa masama ay maihanda.

¹⁴Sapagkat hindi itatakuwil ng PANGINOON ang bayan niya, hindi niya iiwan ang kanyang mana;

¹⁵sapagkat ang katarungan ay babalik sa katuwiran, at ito ay susundin ng lahat ng may matuwid na puso.

¹⁶Sino ang babangon para sa akin laban sa masama? Sinong tatayo para sa akin laban sa mga gumagawa ng kasamaan?

¹⁷Kung ang PANGINOON ay hindi ko naging saklolo, ang kaluluwa ko'y maninirahan na sana sa lupain ng katahimikan.

¹⁸Nang aking sabihin, “Ang aking paa ay dumulas,” O PANGINOON, aalalayan mo ako ng iyong pag-ibig na wagas.

¹⁹Kapag sa aking puso ay maraming pag-aalaala, ang iyong mga pag-aliw ay nagpapasaya sa aking kaluluwa.

²⁰Makakasanib ba sa iyo ang trono ng kasamaan, silang bumabalangkas ng masama sa pamamagitan ng batas?

²¹Sila'y nagsasama-sama laban sa buhay ng matuwid, at hinahatulan ng kamatayan ang walang sala.

²²Ngunit ang PANGINOON ay naging aking muog; at ang Diyos ko'y malaking bato na aking kanlungan.

²³At dinala niya sa kanila ang kanilang sariling kasamaan, at papawiin sila dahil sa kanilang kasamaan; papawiin sila ng PANGINOON naming Diyos.