Read Ang Biblia, 2001 Mga Awit 97 Bible Online

Mga Awit 97 - Ang Biblia, 2001 bible

Mga Awit 97

¹Ang PANGINOON ay naghahari! Magalak ang lupa; ang maraming pulo ay matuwa nawa!

²Nasa palibot niya ang mga ulap at pusikit na kadiliman; ang saligan ng kanyang trono ay katuwiran at kahatulan.

³Apoy ang nasa unahan niya, at sinusunog ang kanyang kaaway sa buong palibot.

⁴Nililiwanagan ng kanyang mga kidlat ang sanlibutan; nakikita ng lupa at ito'y nayayanig.

⁵Ang mga bundok ay natunaw na parang pagkit sa harapan ng PANGINOON, sa harapan ng Panginoon ng buong lupa.

⁶Ipinahahayag ng langit ang kanyang katuwiran, at namasdan ng lahat ng bayan ang kanyang kaluwalhatian.

⁷Mapahiya nawa silang lahat na sumasamba sa mga larawan, na kanilang ipinagmamalaki ang diyus-diyosan; lahat ng mga diyos ay sasamba sa kanya.

⁸Narinig ng Zion at siya'y natuwa, at ang mga anak na babae ng Juda ay nagalak, dahil sa iyong mga kahatulan, O Diyos.

⁹Sapagkat ikaw, O PANGINOON, ay kataas-taasan sa buong lupa; ikaw ay higit na mataas kaysa lahat ng mga diyos.

¹⁰Kayong nagmamahal sa PANGINOON, kamuhian ninyo ang kasamaan, ang kaluluwa ng kanyang mga banal ay kanyang iniingatan; kanyang sinasagip sila sa kamay ng makasalanan.

¹¹Ang liwanag ay itinatanim para sa mga matuwid; at ang kagalakan para sa may matuwid na puso.

¹²Magalak kayo sa PANGINOON, kayong mga matuwid; at magpasalamat sa kanyang banal na pangalan.