Read Ang Biblia, 2001 Mga Kawikaan 10 Bible Online

Mga Kawikaan 10 - Ang Biblia, 2001 bible

Mga Kawikaan 10

¹Mga kawikaan ni Solomon. Ang matalinong anak ay nakapagpapaligaya sa ama, ngunit ang hangal na anak ay kalungkutan sa kanyang ina.

²Ang mga kayamanan na mula sa kasamaan ay hindi mapapakinabangan, ngunit ang katuwiran ay nagliligtas sa kamatayan.

³Hindi hinahayaan ng PANGINOON na magutom ang matuwid, ngunit ang nasa ng masama ay kanyang pinapatid.

⁴Ang mapagpabayang kamay ay dahilan ng kahirapan, ngunit ang kamay ng masipag ay nagpapayaman.

⁵Isang pantas na anak siyang nagtitipon sa tag-araw, ngunit siyang natutulog sa tag-ani ay nagdadala ng kahihiyan.

⁶Nasa ulo ng matuwid ang mga pagpapala, ngunit nagtatago ng karahasan ang bibig ng masama.

⁷Ang alaala ng matuwid ay isang pagpapala, ngunit ang pangalan ng masama ay mapapariwara.

⁸Ang pantas sa puso ay susunod sa mga kautusan, ngunit ang madaldal na hangal ay mabubuwal.

⁹Siyang lumalakad sa katapatan ay lumalakad nang tiwasay, ngunit ang sumisira ng kanyang mga lakad ay matutuklasan.

¹⁰Siyang kumikindat ng mata ay pinagmumulan ng kaguluhan, ngunit ang madaldal na hangal ay mabubuwal.

¹¹Ang bibig ng matuwid ay bukal ng buhay, ngunit ang bibig ng masama ay nagtatago ng karahasan.

¹²Ang pagkamuhi ay nagbubunsod ng alitan, ngunit tinatakpan ng pag-ibig ang lahat ng pagsuway.

¹³Nasusumpungan sa mga labi ng may unawa ang karunungan, ngunit ang pamalo ay para sa likod ng walang kaunawaan.

¹⁴Ang mga pantas ay nag-iimbak ng kaalaman, ngunit ang kadaldalan ng hangal ay naglalapit sa kapahamakan.

¹⁵Ang kayamanan ng mayaman ang kanyang lunsod na matibay; ang kahirapan ng dukha ang kanilang kapahamakan.

¹⁶Ang kabayaran ng matuwid ay patungo sa buhay; ang pakinabang ng masama ay tungo sa kasalanan.

¹⁷Nasa daan ng buhay siyang nakikinig ng pangaral, ngunit siyang tumatanggi sa saway ay naliligaw.

¹⁸Siyang nagkukubli ng pagkamuhi ay may labing mapanlinlang, at siyang naninirang-puri ay isang hangal.

¹⁹Sa dami ng mga salita ay hindi mawawalan ng pagsalangsang, ngunit siyang nagpipigil ng kanyang mga labi ay may karunungan.

²⁰Ang dila ng matuwid ay piling pilak ang katulad, ang isipan ng masama ay maliit ang katumbas.

²¹Ang mga labi ng matuwid ay nagpapakain ng marami, ngunit ang hangal ay namamatay sa kakulangan ng bait sa sarili.

²²Ang pagpapala ng PANGINOON ay nagpapayaman, at hindi niya ito dinaragdagan ng kapanglawan.

²³Isang libangan sa hangal ang paggawa ng kasamaan, ngunit ang matalinong asal, sa taong may unawa ay kasiyahan.

²⁴Ang kinatatakutan ng masama, sa kanya ay sasapit, ngunit ipagkakaloob ang nasa ng matuwid.

²⁵Pagdaan ng unos, ang masama'y napaparam, ngunit ang matuwid ay matatag magpakailanman.

²⁶Kung paano ang suka sa mga ngipin, at ang usok sa mga mata, gayon ang tamad sa mga nagsusugo sa kanya.

²⁷Ang takot sa PANGINOON ay nagpapahaba ng buhay, ngunit ang mga taon ng masama ay maiikli lamang.

²⁸Ang pag-asa ng matuwid ay hahantong sa kaligayahan, ngunit ang inaasam ng masama ay mapaparam.

²⁹Ang daan ng PANGINOON sa matuwid ay tanggulan, ngunit kapahamakan sa mga gumagawa ng kasamaan.

³⁰Ang matuwid ay hindi makikilos kailanman, ngunit ang masama, sa lupain ay hindi tatahan.

³¹Ang bibig ng matuwid ay nagbibigay ng karunungan, ngunit ang mandarayang dila ay ihihiwalay.

³²Nalalaman ng mga labi ng matuwid ang nakakalugod, ngunit ang bibig ng masama, ang alam ay baluktot.