Read Ang Biblia, 2001 Mga Kawikaan 12 Bible Online

Mga Kawikaan 12 - Ang Biblia, 2001 bible

Mga Kawikaan 12

¹Ang umiibig sa pangaral ay umiibig sa kaalaman, ngunit ang namumuhi sa saway ay isang hangal.

²Ang mabuting tao ay magtatamo ng biyaya ng PANGINOON, ngunit kanyang parurusahan ang taong may masasamang layon.

³Hindi tumatatag ang isang tao sa pamamagitan ng kasamaan, ngunit ang ugat ng matuwid ay hindi magagalaw.

⁴Ang mabuting babae ay korona ng kanyang asawa, ngunit parang kabulukan sa kanyang mga buto kung kahihiyan ang dulot niya.

⁵Ang mga iniisip ng matuwid ay makatarungan, ang mga payo ng masama ay kataksilan.

⁶Ang mga salita ng masama ay nag-aabang ng dugo, ngunit ang bibig ng matuwid ang nagliligtas sa tao.

⁷Ang masasama ay ibinabagsak at pinapawi, ngunit ang sambahayan ng matuwid ay mananatili.

⁸Pinupuri ang tao ayon sa kanyang katinuan, ngunit ang may masamang puso ay hahamakin lamang.

⁹Mabuti pa ang taong mapagpakumbaba na gumagawa para sa kanyang sarili, kaysa nagkukunwaring dakila na wala namang makain.

¹⁰Buhay ng kanyang hayop, pinapahalagahan ng matuwid, ngunit ang kaawaan ng masama ay malupit.

¹¹Siyang nagbubungkal ng kanyang lupa ay magkakaroon ng tinapay na sagana, ngunit siyang sumusunod sa walang kabuluhang bagay ay walang unawa.

¹²Ang matatag na tore ng masama ay nawawasak, ngunit ang ugat ng matuwid ay nananatiling matatag.

¹³Sa pagsalangsang ng mga labi nasisilo ang masamang tao, ngunit ang matuwid ay nakakatakas sa gulo.

¹⁴Ang tao ay masisiyahan sa kabutihan sa pamamagitan ng bunga ng kanyang bibig; at ang mga gawain ng mga kamay ng tao sa kanya'y bumabalik.

¹⁵Ang lakad ng hangal, sa sarili niyang paningin ay wasto, ngunit ang marunong ay nakikinig sa payo.

¹⁶Ang pagkayamot ng hangal ay agad nahahalata, ngunit hindi pinapansin ng matalino ang pagkutya.

¹⁷Ang nagsasabi ng katotohanan ay nagbibigay ng tapat na katibayan, ngunit ang sinungaling na saksi ay nagsasalita ng kadayaan.

¹⁸Mga salitang padalus-dalos ay parang ulos ng espada, ngunit ang dila ng pantas ay kagalingan ang dala.

¹⁹Ang labi ng katotohanan ay nagtatagal kailanman, ngunit ang sinungaling na dila ay panandalian lamang.

²⁰Ang pandaraya ay nasa puso ng mga kumakatha ng kasamaan, ngunit ang nagpaplano ng kabutihan ay may kagalakan.

²¹Walang mangyayaring kapahamakan sa matuwid, ngunit ang masama ay napupuno ng panganib.

²²Mga sinungaling na labi sa PANGINOON ay kasuklamsuklam, ngunit ang gumagawa nang may katotohanan ay kanyang kinalulugdan.

²³Ang taong marunong ay nagkukubli ng kaalaman; ngunit ipinahahayag ng puso ng mga hangal ang kanilang kahangalan.

²⁴Ang kamay ng masipag ay mamamahala, ngunit ang tamad ay malalagay sa sapilitang paggawa.

²⁵Nagpapabigat sa puso ng tao ang pagkabalisa, ngunit ang mabuting salita ay nagpapasaya sa kanya.

²⁶Ang matuwid sa kanyang kapwa ay patnubay, ngunit ang lakad ng masama sa kanila'y nakapagpapaligaw.

²⁷Hindi makakahuli ng hayop ang taong tamad, ngunit magkakamit ng mahalagang kayamanan ang masipag.

²⁸Nasa daan ng katuwiran ang buhay; ngunit ang landas ng kamalian ay tungo sa kamatayan.