Read Ang Biblia, 2001 Mga Kawikaan 18 Bible Online

Mga Kawikaan 18 - Ang Biblia, 2001 bible

Mga Kawikaan 18

¹Ang namumuhay nang nag-iisa ay nagpapasasa, at hinahamak ang lahat ng may mabuting pasiya.

²Ang hangal ay hindi nalulugod sa pang-unawa, kundi ang maihayag lamang ang sariling paniniwala.

³Kapag dumarating ang kasamaan, ang paghamak ay dumarating din naman, at kasama ng pagkutya ang kahihiyan.

⁴Ang mga salita ng bibig ng tao ay parang malalim na tubig; ang bukal ng karunungan ay parang umaagos na batis.

⁵Hindi mabuti na ang masamang tao ay panigan, o pagkaitan man ang taong matuwid ng katarungan.

⁶Ang mga labi ng hangal ay nagdadala ng alitan, at ang kanyang bibig ay nag-aanyaya ng hampasan.

⁷Ang bibig ng hangal ang kapahamakan niya, at ang kanyang mga labi ay bitag ng kanyang kaluluwa.

⁸Ang mga salita ng mapagbulong ay masasarap na subo ang katulad, sila'y nagsisibaba sa kaloob-looban ng katawan.

⁹Siyang sa kanyang gawain ay pabaya, ay isang kapatid ng maninira.

¹⁰Ang pangalan ng PANGINOON ay isang toreng matibay; tinatakbuhan ng matuwid at doon siya'y tiwasay.

¹¹Ang yaman ng mayamang tao ang kanyang matibay na lunsod, at sa kanyang pag-iisip ay tulad ng pader na matayog.

¹²Bago ang pagkawasak ang puso ng tao ay palalo muna, ngunit nauuna sa karangalan ang pagpapakumbaba.

¹³Siyang sumasagot bago pa man makinig, ito'y kahangalan at sa kanya'y kahihiyan.

¹⁴Aalalay ang espiritu ng tao sa kanyang karamdaman; ngunit ang bagbag na diwa, sino ang makakapasan?

¹⁵Ang may matalinong pag-iisip ay kumukuha ng kaalaman, at ang pandinig ng marunong ay humahanap ng kaalaman.

¹⁶Ang kaloob ng tao ay nagbubukas ng daan sa kanya, at dinadala siya sa harap ng mga taong dakila.

¹⁷Ang unang naglalahad ng kanyang panig ay parang matuwid, hanggang sa may ibang dumating at siya'y siyasatin.

¹⁸Ang pagpapalabunutan sa mga pagtatalo'y nagwawakas, at nagpapasiya sa mga magkatunggaling malalakas.

¹⁹Ang kapatid na nasaktan ay tulad ng lunsod na matibay, ngunit parang mga halang ng isang kastilyo ang pag-aaway.

²⁰Ang isang tao'y nabubusog ng bunga ng bibig niya, sa bunga ng kanyang mga labi ay nasisiyahan siya.

²¹Ang kamatayan at ang buhay ay nasa kapangyarihan ng dila; at ang umiibig sa kanya ay kakain ng kanyang mga bunga.

²²Ang nakakatagpo ng asawang babae ay nakakatagpo ng mabuting bagay, at mula sa PANGINOON, pagpapala ay nakakamtan.

²³Ang mahirap ay gumagamit ng mga pakiusap, ngunit ang mayaman ay sumasagot na may kagaspangan.

²⁴May mga kaibigang nagkukunwaring kaibigan, ngunit may kaibigan na mas madikit kaysa isang kapatid.