Read Ang Biblia, 2001 Mga Kawikaan 21 Bible Online

Mga Kawikaan 21 - Ang Biblia, 2001 bible

Mga Kawikaan 21

¹Ang puso ng hari ay nasa kamay ng PANGINOON na parang batis ng tubig; ibinabaling niya ito saanman niya ibig.

²Matuwid sa kanyang sariling mga mata ang bawat lakad ng tao, ngunit tinitimbang ng PANGINOON ang mga puso.

³Ang paggawa ng katuwiran at katarungan, ay higit na kalugud-lugod sa PANGINOON kaysa pag-aalay.

⁴Ang mapagmataas na tingin, at ang pusong palalo, siyang ilaw ng masama, ang mga ito'y kasalanan.

⁵Ang mga plano ng masipag ay patungo sa kasaganaan, ngunit ang bawat nagmamadali ay humahantong lamang sa kasalatan.

⁶Ang pagkakaroon ng kayamanan sa pamamagitan ng dilang bulaan, ay singaw na tinatangay at bitag ng kamatayan.

⁷Ang karahasan ng masama ang sa kanila'y tatangay, sapagkat ayaw nilang gawin ang makatarungan.

⁸Liko ang lakad ng may kasalanan, ngunit matuwid ang asal ng dalisay.

⁹Mas mabuting tumira sa isang sulok ng bubungan, kaysa sa isang bahay na kasama ang isang babaing palaaway.

¹⁰Ang kaluluwa ng masama ay kasamaan ang ninanasa, ang kanyang kapwa ay hindi nakakasumpong ng awa sa kanyang mga mata.

¹¹Kapag ang manlilibak ay pinarurusahan, tumatalino ang walang muwang, kapag ang matalino ay tinuturuan, siya'y tumatanggap ng kaalaman.

¹²Pinagmamasdan ng matuwid ang bahay ng masama, ibinubulid ang masama sa pagkasira.

¹³Ang nagtatakip ng kanyang mga pandinig sa daing ng dukha, siya man ay dadaing, ngunit hindi diringgin.

¹⁴Ang lihim na regalo ay nagpapatahimik ng galit, ngunit ang suhol sa dibdib ay malaking poot.

¹⁵Kagalakan sa matuwid kapag nagawa ang katarungan, ngunit kabalisahan sa gumagawa ng kasamaan.

¹⁶Ang taong lumilihis sa landas ng kaunawaan, ay magpapahinga sa kapisanan ng mga patay.

¹⁷Ang umiibig sa kalayawan ay magiging dukha, ang umiibig sa alak at langis ay hindi sasagana.

¹⁸Ang masama ay pantubos para sa matuwid, at ang taksil, sa matuwid ay kapalit.

¹⁹Mas mabuti pang tumira sa ilang na lupain, kaysa makasama ang babaing palaaway at bugnutin.

²⁰Nananatili sa tahanan ng pantas ang mahalagang kayamanan, ngunit ito'y nilalamon ng isang hangal.

²¹Ang sumusunod sa katuwiran at kabaitan, ay makakasumpong ng buhay, katuwiran, at karangalan.

²²Sinusukat ng taong pantas ang lunsod ng makapangyarihan, at ibinabagsak ang muog na kanilang pinagtitiwalaan.

²³Ang nag-iingat ng kanyang dila at bibig, ay nag-iingat ng kanyang sarili mula sa ligalig.

²⁴Ang palalo at mapagmataas na tao, “manlilibak” ang kanyang pangalan, siya'y gumagawa na may palalong kahambugan.

²⁵Ang pagnanasa ng tamad ang sa kanya'y pumapatay, sapagkat ayaw magpagal ng kanyang mga kamay.

²⁶Sa buong maghapon ang masama'y nag-iimbot, ngunit ang matuwid ay nagbibigay at hindi nagdadamot.

²⁷Karumaldumal ang alay ng masama; gaano pa kaya, kapag dinadala niya ito na may masamang panukala.

²⁸Mapapahamak ang sinungaling na saksi, ngunit ang salita ng taong nakikinig ay mananatili.

²⁹Ang masamang tao ay nagmamatigas ng kanyang mukha; ngunit isinasaalang-alang ng taong matuwid ang mga lakad niya.

³⁰Walang karunungan, pang-unawa, o payo ang mananaig laban sa PANGINOON.

³¹Ang kabayo ay inihahanda para sa araw ng paglalaban, ngunit nauukol sa PANGINOON ang pagtatagumpay.