Read Ang Biblia, 2001 Mga Kawikaan 22 Bible Online

Mga Kawikaan 22 - Ang Biblia, 2001 bible

Mga Kawikaan 22

¹Ang mabuting pangalan ay dapat piliin, kaysa malaking kayamanan, at mabuti kaysa pilak at ginto ang magandang kalooban.

²Ang mayaman at ang dukha ay nagkakasalubong kapwa; ang PANGINOON ang sa kanilang lahat ay gumawa.

³Ang matalinong tao ay nakakakita ng panganib at nagkukubli siya, ngunit nagpapatuloy ang walang muwang at siya'y nagdurusa.

⁴Ang gantimpala sa pagpapakumbaba at takot sa PANGINOON ay kayamanan, karangalan, at buhay.

⁵Nasa daan ng mandaraya ang mga tinik at silo, ang nag-iingat ng kanyang sarili, sa mga iyon ay lalayo.

⁶Sanayin mo ang bata sa daan na dapat niyang lakaran, at kapag tumanda na siya ay hindi niya ito tatalikuran.

⁷Ang namumuno sa dukha ay ang mayaman, at ang nanghihiram ay alipin ng nagpapahiram.

⁸Ang naghahasik ng kasamaan ay aani ng kapahamakan; at ang pamalo ng kanyang poot ay di magtatagumpay.

⁹Ang may mga matang mapagbigay ay pinagpapala, sapagkat nagbibigay siya ng kanyang tinapay sa mga dukha.

¹⁰Itaboy mo ang manlilibak, at ang pagtatalo ay aalis; ang pag-aaway at pang-aapi ay matitigil.

¹¹Siyang umiibig ng kalinisan ng puso, at mabiyaya ang pananalita, ang hari ay magiging kaibigan niya.

¹²Ang mga mata ng PANGINOON ay nagbabantay sa kaalaman, ngunit ang mga salita ng taksil ay kanyang ibinubuwal.

¹³Sinasabi ng tamad, “May leon sa labas! Mapapatay ako sa mga lansangan!”

¹⁴Ang bibig ng masamang babae ay isang malalim na hukay; siyang kinapopootan ng PANGINOON doon ay mabubuwal.

¹⁵Nakabalot sa puso ng bata ang kahangalan, ngunit inilalayo ito sa kanya ng pamalo ng pagsaway.

¹⁶Ang umaapi sa dukha upang magpalago ng kanyang kayamanan, at nagbibigay sa mayaman, ay hahantong lamang sa kasalatan.

¹⁷Ito ang mga salita ng pantas: Ikiling mo ang iyong pandinig, at dinggin mo ang aking mga salita, at gamitin mo ang iyong isip sa aking kaalaman.

¹⁸Sapagkat magiging kaaya-aya kung ito'y iyong iingatan sa loob mo, kung mahahandang magkakasama sa mga labi mo.

¹⁹Upang malagak sa PANGINOON ang tiwala mo, aking ipinakilala sa iyo sa araw na ito, oo, sa iyo.

²⁰Hindi ba ako sumulat sa iyo ng tatlumpung kasabihan, ng mga pangaral at kaalaman;

²¹upang ipakita sa iyo ang matuwid at totoo, upang maibigay mo ang totoong sagot sa mga nagsugo sa iyo?

²²Huwag mong nakawan ang dukha, sapagkat siya'y dukha, ni gipitin man ang nagdadalamhati sa pintuang-bayan;

²³sapagkat ipinaglalaban ng PANGINOON ang panig nila, at sinasamsaman ng buhay ang sumasamsam sa kanila.

²⁴Huwag kang makipagkaibigan sa taong magagalitin, at huwag kang sasama sa taong bugnutin;

²⁵baka matutunan mo ang kanyang mga lakad, at ang kaluluwa mo ay mahulog sa bitag.

²⁶Huwag kang maging isa sa kanila na nagbibigay-sangla, o sa kanila na nananagot sa mga utang.

²⁷Kung wala kang maibibigay na kabayaran, bakit kailangang kunin sa ilalim mo ang iyong higaan?

²⁸Huwag mong alisin ang lumang batong hangganan, na inilagay ng iyong mga magulang.

²⁹Nakikita mo ba ang taong mahusay[1] sa kanyang gawain? Siya'y tatayo sa harap ng mga hari, hindi siya tatayo sa harap ng mga taong hamak.