Read Ang Biblia, 2001 Mga Kawikaan 23 Bible Online

Mga Kawikaan 23 - Ang Biblia, 2001 bible

Mga Kawikaan 23

¹Kapag ikaw ay umupo upang kumain na kasalo ng isang pinuno, pansinin mong mabuti kung ano ang nasa harap mo;

²at ang lalamunan mo'y lagyan mo ng patalim, kung ikaw ay isang taong magana sa pagkain.

³Huwag mong nasain ang kanyang masasarap na pagkain, sapagkat mapandaya ang mga pagkaing iyon.

⁴Huwag magpakapagod sa pagpapayaman, maging matalino ka na ang sarili'y mapigilan.

⁵Kapag mapadako doon ang iyong paningin, iyon ay napaparam; sapagkat biglang nagkakapakpak ang kayamanan, lumilipad na gaya ng agila patungong kalangitan.

⁶Tinapay ng kuripot ay huwag mong kainin, ni nasain mo man ang kanyang masarap na pagkain.

⁷Sapagkat kung ano ang iniisip niya sa loob niya, ay gayon siya: “Kumain at uminom ka!” sabi niya sa iyo; ngunit ang puso niya ay hindi sumasaiyo.

⁸Ang subo na iyong kinain ay iyong iluluwa, at iyong sasayangin ang matatamis mong salita.

⁹Huwag kang magsalita sa pandinig ng hangal, sapagkat ang karunungan ng mga salita mo ay hahamakin niya lamang.

¹⁰Huwag mong alisin ang lumang batong pananda, at huwag mong pasukin ang mga bukid ng ulila,

¹¹sapagkat ang kanilang Manunubos ay makapangyarihan; ang kanilang panig laban sa iyo'y kanyang ipagsasanggalang.

¹²Ihilig mo ang iyong puso sa pangaral, at ang iyong mga tainga sa mga salita ng kaalaman.

¹³Huwag mong ipagkait sa bata ang saway, kung hampasin mo siya ng pamalo, siya'y hindi mamamatay.

¹⁴Kung siya'y hahampasin mo ng pamalo, mula sa Sheol ang kanyang kaluluwa'y ililigtas mo.

¹⁵Kung ang iyong puso ay marunong, aking anak, ang puso ko rin naman ay magagalak.

¹⁶Ang kaluluwa ko'y matutuwa, kapag ang iyong mga labi'y nagsasalita ng tama.

¹⁷Huwag mainggit ang iyong puso sa mga makasalanan, kundi magpatuloy ka sa takot sa PANGINOON sa buong araw.

¹⁸Sapagkat tunay na may kinabukasan, at ang iyong pag-asa ay hindi mapaparam.

¹⁹Makinig ka, anak ko, at ikaw ay magpakatalino, at iyong patnubayan sa daan ang puso mo.

²⁰Huwag kang makisama sa mga maglalasing, at silang sa karne ay matatakaw kumain.

²¹Sapagkat ang lasenggo at ang matakaw ay darating sa kahirapan, at ang pagkaantukin ay magbibihis sa tao ng basahan.

²²Dinggin mo ang iyong ama na naging anak ka, at huwag mong hamakin ang iyong ina kung siya'y matanda na.

²³Bumili ka ng katotohanan at huwag mong ipagbili naman, bumili ka ng karunungan, ng pangaral at kaunawaan.

²⁴Ang ama ng matuwid ay lubos na sasaya, at ang nagkaroon ng matalinong anak ay magagalak sa kanya.

²⁵Hayaang ang iyong ama at ina ay sumaya, at siyang nagsilang sa iyo ay lumigaya.

²⁶Anak ko, ang puso mo sa akin ay ibigay, at magmasid[1] ang iyong mga mata sa aking mga daan.

²⁷Sapagkat ang masamang babae ay isang malalim na hukay, at ang babaing di kilala ay isang makipot na balon.

²⁸Oo, siya'y nag-aabang na parang tulisan, at nagpaparami ng mga taksil sa mga kalalakihan.

²⁹Sinong may pagkaaba? Sinong may kalungkutan? Sinong may gulo? Sinong may karaingan? Sino ang may sugat na walang kadahilanan? Sino ang may matang may kapulahan?

³⁰Silang naghihintay sa alak; silang sumusubok ng pinaghalong alak.

³¹Huwag kang tumingin sa alak kapag ito'y mapula, kapag nagbibigay ng kanyang kulay sa kopa, at maayos na bumababa.

³²Sa huli ay parang ahas itong kumakagat, at ulupong na tumutuklaw ang katulad.

³³Ang iyong mga mata ay makakakita ng mga kakatuwang bagay, at ang iyong puso ay magsasabi ng mga mandarayang bagay.

³⁴Ikaw ay magiging parang taong nahihiga sa gitna ng karagatan, o parang nahihiga sa dulo ng isang tagdan ng sasakyan.

³⁵“Kanilang pinalo ako, ngunit hindi ako nasaktan; hinampas nila ako, ngunit hindi ko naramdaman. Kailan ako gigising? Hahanap ako ng isa pang tagay.”