Read Ang Biblia, 2001 Mga Kawikaan 26 Bible Online

Mga Kawikaan 26 - Ang Biblia, 2001 bible

Mga Kawikaan 26

¹Tulad ng yelo sa tag-init, o ng ulan sa anihan, ang karangalan ay hindi nababagay sa hangal.

²Tulad ng maya sa kanyang paggagala, tulad ng langay-langayan sa kanyang paglipad, ang sumpa na walang kadahilanan ay hindi lumalapag.

³Ang hagupit ay sa kabayo, ang bokado ay sa asno, at sa likod ng mga hangal ay ang pamalo.

⁴Huwag mong sagutin ang hangal ayon sa kahangalan niya, baka ikaw sa kanya ay mapagaya.

⁵Sagutin mo ang hangal ayon sa kahangalan niya, baka siya'y maging pantas sa kanyang sariling mga mata.

⁶Siyang nagpapadala ng mensahe sa kamay ng hangal, ay pumuputol sa sarili niyang mga paa at umiinom ng karahasan.

⁷Tulad ng mga binti ng pilay na nakabiting walang kabuluhan, gayon ang kawikaan sa bibig ng mga hangal.

⁸Tulad ng isang nagbabalot ng bato sa tirador, gayon ang nagbibigay ng karangalan sa isang hangal.

⁹Tulad ng tinik na tumutusok sa kamay ng lasing, gayon ang kawikaan sa bibig ng mga hangal.

¹⁰Tulad ng mamamanang sumusugat sa lahat, gayon ang umuupa sa nagdaraang hangal o lasing.

¹¹Tulad ng aso na sa kanyang suka ay bumabalik, gayon ang hangal na sa kanyang kahangalan ay umuulit.

¹²Nakikita mo ba ang taong marunong sa ganang sarili niya? May higit na pag-asa pa ang hangal kaysa kanya.

¹³Sinasabi ng tamad, “May leon sa daan; may leon sa mga lansangan!”

¹⁴Kung paano ang pintuan ay pumipihit sa kanyang bisagra, gayon ang tamad sa higaan niya.

¹⁵Ibinabaon ng tamad ang kamay niya sa pinggan; ang dalhin uli iyon sa kanyang bibig ay kanyang kinapapaguran.

¹⁶Ang tamad ay mas marunong sa kanyang sariling pananaw, kaysa pitong tao na makakasagot na may katuwiran.

¹⁷Ang nakikialam sa hindi naman niya away, ay gaya ng humahawak sa tainga ng asong nagdaraan.

¹⁸Tulad ng taong ulol na naghahagis ng mga nakakasakit na sandata, mga pana, at kamatayan;

¹⁹gayon ang taong nandaraya sa kanyang kapwa, at nagsasabi, “Ako'y nagbibiro lamang!”

²⁰Sapagkat sa kakulangan ng gatong ang apoy ay namamatay, at kung saan walang salita ng sitsit ay tumitigil ang alitan.

²¹Kung paano ang mga uling sa maiinit na baga, at ang kahoy sa apoy; gayon ang taong palaaway na nagpapaningas ng sigalot.

²²Ang mga salita ng sitsit ay parang mga subong malinamnam, nagsisibaba ang mga ito sa kaloob-looban ng katawan.

²³Ang mapupusok na labi at masamang puso ay parang sisidlang-lupa na nababalot ng dumi ng pilak.

²⁴Ang namumuhi ay nagkukunwari sa pamamagitan ng mga labi niya, at siya'y naglalagay sa puso niya ng daya.

²⁵Kapag magiliw siyang magsalita, huwag mo siyang paniwalaan; sapagkat sa kanyang puso ay may pitong karumaldumal.

²⁶Bagaman ang kanyang pagkamuhi ay matakpan ng kadayaan, ang kanyang kasamaan ay malalantad sa harap ng kapulungan.

²⁷Ang humuhukay ng balon ay mahuhulog doon, at ang nagpapagulong ng bato ay babalikan niyon.

²⁸Ang sinungaling na dila ay namumuhi sa kanyang mga sinaktan, at ang bibig ng di-tapat magpuri ay gumagawa ng kasiraan.