Read Ang Biblia, 2001 Mga Kawikaan 29 Bible Online

Mga Kawikaan 29 - Ang Biblia, 2001 bible

Mga Kawikaan 29

¹Ang madalas na sawayin ngunit ang ulo ay matigas, ay biglang mababali, at wala nang lunas.

²Kapag ang matutuwid ay namamahala, ang bayan ay nagsasaya, ngunit kapag ang masama ay namumuno, ang bayan ay nagbubuntong-hininga.

³Ang umiibig sa karunungan ay nagpapasaya sa kanyang ama; ngunit ang nakikisama sa upahang babae[1] ay sumisira ng kayamanan niya.

⁴Pinatatatag ng hari ang lupain sa pamamagitan ng katarungan; ngunit ginigiba ito ng humihingi ng suhol na sapilitan.

⁵Ang taong kunwari'y pumupuri sa kanyang kapwa, ay naglalatag ng lambat sa kanyang mga paa.

⁶Ang masamang tao'y nasisilo sa kanyang pagsalangsang, ngunit ang taong matuwid ay umaawit at nagdiriwang.

⁷Alam ng matuwid ang karapatan ng dukha; ngunit ang gayong kaalaman ay di nauunawaan ng masama.

⁸Ang mga manlilibak ang sa isang lunsod ay tumutupok, ngunit ang matatalinong tao ay nag-aalis ng poot.

⁹Kung ang pantas ay magkaroon ng pakikipagtalo sa isang hangal, magagalit lamang o tatawa ang hangal, at hindi magkakaroon ng katahimikan.

¹⁰Ang mga taong uhaw sa dugo ay namumuhi sa walang sala, at ang buhay ng matuwid ay hinahabol nila.

¹¹Inihihinga ng hangal ang kanyang buong galit, ngunit ang matalino ay nagpipigil nang tahimik.

¹²Kung ang pinuno ay nakikinig sa kasinungalingan, magiging masasama ang lahat niyang tauhan.

¹³Ang dukha at ang nang-aapi ay nagkakasalubong, ang mga mata nilang pareho ay pinagliliwanag ng PANGINOON.

¹⁴Kung ang hari ay humahatol sa dukha nang may katarungan, ang kanyang trono ay matatatag magpakailanman.

¹⁵Ang pamalo at saway ay nagbibigay ng karunungan, ngunit ang batang pinababayaan, sa kanyang ina ay nagbibigay-kahihiyan.

¹⁶Kapag ang masama ay nanunungkulan, dumarami ang pagsalangsang, ngunit pagmamasdan ng matuwid ang kanilang pagkabuwal.

¹⁷Supilin mo ang iyong anak, at bibigyan ka niya ng kapahingahan; ang iyong puso ay bibigyan niya ng kasiyahan.

¹⁸Kung saan walang pangitain, nagpapabaya ang taong-bayan, ngunit mapalad ang sumusunod sa kautusan.

¹⁹Ang alipin ay hindi masasaway ng mga salita lamang, sapagkat kahit nauunawaan niya ay hindi niya papakinggan.

²⁰Nakikita mo ba ang tao na padalus-dalos sa kanyang mga salita? May pag-asa pa ang hangal kaysa kanya.

²¹Siyang nag-aaruga sa kanyang lingkod mula sa pagkabata, sa bandang huli ay magiging kanyang tagapagmana.

²²Ang taong magagalitin ay lumilikha ng away, at ang mainitin ang ulo ay sanhi ng maraming pagsuway.

²³Ang kapalaluan ng tao ang sa kanya'y magpapababa, ngunit magtatamo ng karangalan ang may mapagpakumbabang diwa.

²⁴Ang kasamahan ng magnanakaw ay namumuhi sa kanyang buhay; naririnig niya ang sumpa, ngunit walang ipinaaalam.

²⁵Ang takot sa tao ay naglalatag ng bitag, ngunit ang nagtitiwala sa PANGINOON ay maliligtas.

²⁶Marami ang humahanap ng lingap ng isang tagapamahala, ngunit ang katarungan ay sa PANGINOON makukuha.

²⁷Ang masamang tao ay karumaldumal sa matuwid; at ang matuwid sa kanyang lakad ay karumaldumal sa masama.