Read Ang Biblia, 2001 Mga Kawikaan 3 Bible Online

Mga Kawikaan 3 - Ang Biblia, 2001 bible

Mga Kawikaan 3

¹Anak ko, ang aral ko'y huwag mong kalimutan, kundi ang aking mga utos sa iyong puso'y ingatan;

²sapagkat kahabaan ng araw at mga taon ng buhay, at kapayapaan, ang sa iyo'y kanilang ibibigay.

³Huwag mong hayaang iwan ka ng kabaitan at katotohanan; itali mo ang mga ito sa palibot ng iyong leeg, isulat mo sa iyong puso.

⁴Sa gayo'y makakatagpo ka ng lingap at mabuting pangalan sa paningin ng Diyos at ng tao.

⁵Sa PANGINOON ay buong puso kang magtiwala, at huwag kang manalig sa sarili mong pang-unawa.

⁶Sa lahat ng iyong mga lakad siya'y iyong kilalanin, at itutuwid niya ang iyong mga landasin.

⁷Huwag kang magpakapantas sa iyong sariling mga mata; matakot ka sa PANGINOON, at sa kasamaan ay lumayo ka.

⁸Ito'y magiging kagalingan sa laman mo, at kaginhawahan sa iyong mga buto.

⁹Parangalan mo ang PANGINOON mula sa iyong kayamanan, at ng mga unang bunga ng lahat mong ani;

¹⁰sa gayo'y mapupuno nang sagana ang iyong imbakan, at aapawan ng bagong alak ang iyong mga sisidlan.

¹¹Anak ko, ang disiplina ng PANGINOON ay huwag mong hamakin, at ang kanyang saway ay huwag mong itakuwil.

¹²Sapagkat sinasaway ng PANGINOON ang kanyang minamahal, gaya ng ama sa anak na kanyang kinalulugdan.

¹³Mapalad ang tao na nakakasumpong ng karunungan, at ang tao na nagtatamo ng kaunawaan.

¹⁴Sapagkat ang pakinabang dito kaysa pilak ay mas mainam, at ang mapapakinabang dito ay higit kaysa gintong dalisay.

¹⁵Kaysa mga alahas, siya ay mas mahalaga, at wala sa mga bagay na ninanasa mo ang maihahambing sa kanya.

¹⁶Ang mahabang buhay ay nasa kanyang kanang kamay; sa kanyang kaliwang kamay ay mga yaman at karangalan.

¹⁷Ang kanyang mga daan ay mga daan ng kaligayahan, at ang lahat niyang mga landas ay kapayapaan.

¹⁸Siya'y punungkahoy ng buhay sa mga humahawak sa kanya; at mapalad ang lahat ng nakakapit sa kanya.

¹⁹Itinatag ng PANGINOON ang daigdig sa pamamagitan ng karunungan; itinayo niya ang mga langit sa pamamagitan ng kaunawaan.

²⁰Sa kanyang kaalaman ang mga kalaliman ay nabiyak, at nagpapatak ng hamog ang mga ulap.

²¹Anak ko, huwag mong hayaang mawalay sa iyong mga mata, ingatan mo ang magaling na dunong at mabuting pagpapasiya,

²²at sila'y magiging buhay sa iyong kaluluwa, at sa iyong leeg ay magiging pampaganda.

²³Kung magkagayo'y tiwasay kang lalakad sa iyong daan, at ang iyong paa ay di matitisod kailanman.

²⁴Kapag ikaw ay nakahiga, hindi ka matatakot; kapag ika'y humimlay, magiging mahimbing ang iyong tulog.

²⁵Huwag kang matakot sa pagkasindak na bigla, o sa pagdating ng pagsalakay ng masama,

²⁶sapagkat ang PANGINOON ang magiging iyong pagtitiwala, at iingatan mula sa pagkahuli ang iyong mga paa.

²⁷Huwag mong ipagkait ang mabuti sa kinauukulan,[1] kapag ito'y nasa kapangyarihang gawin ng iyong kamay.

²⁸Huwag mong sabihin sa iyong kapwa, “Humayo ka, at bumalik na lamang, at bukas ako magbibigay,” gayong mayroon ka naman.

²⁹Huwag kang magbalak ng masama laban sa iyong kapwa, na naninirahan sa tabi mo nang may pagtitiwala.

³⁰Huwag kang makipagtalo sa kanino man nang walang dahilan, kung hindi naman siya gumawa sa iyo ng kasamaan.

³¹Huwag kang mainggit sa taong marahas, at huwag mong piliin ang anuman sa kanyang mga landas;

³²sapagkat sa PANGINOON ang suwail ay kasuklamsuklam, ngunit ang matuwid ay kanyang pinagtitiwalaan.

³³Ang sumpa ng PANGINOON ay nasa bahay ng masama; ngunit ang tahanan ng matuwid ay kanyang pinagpapala.

³⁴Sa mga nanunuya siya ay mapanuya, ngunit sa mapagkumbaba ay nagbibigay siya ng biyaya.

³⁵Ang pantas ay magmamana ng kaluwalhatian, ngunit kahihiyan ang magiging ganti sa mga hangal.