Read Ang Biblia, 2001 Mga Kawikaan 30 Bible Online

Mga Kawikaan 30 - Ang Biblia, 2001 bible

Mga Kawikaan 30

¹Ang mga salita ni Agur na anak ni Jakeh; ng Massa. Sinabi ng lalaki kay Ithiel, kay Ithiel at kay Ucal:

²Tunay na ako'y hangal kaysa kaninuman, pag-unawa ng isang tao ay hindi ko taglay.

³Hindi ako natuto ng karunungan, ni nagkaroon man ako ng kaalaman ng Banal.

⁴Sino ang umakyat sa langit at bumaba? Sino ang nagtipon ng hangin sa kanyang mga kamao? Sinong nagbalot ng tubig sa kanyang damit? Sinong nagtatag ng lahat ng mga dulo ng daigdig? Ano ang kanyang pangalan? At ano ang pangalan ng kanyang anak? Tiyak na iyong nalalaman!

⁵Bawat salita ng Diyos ay subok na totoo, siya'y kalasag sa kanila na kumakanlong sa kanya.

⁶Huwag kang magdagdag sa kanyang mga salita, baka sawayin ka niya at masumpungang sinungaling ka.

⁷Dalawang bagay ang sa iyo'y aking hinihiling; bago ako mamatay ay huwag mong ipagkait sa akin.

⁸Ilayo mo sa akin ang daya at ang kasinungalingan; huwag mo akong bigyan ng kasalatan o kayamanan man; pakainin mo ako ng pagkain na aking kinakailangan,

⁹baka ako'y mabusog, at itakuwil kita at sabihin ko, “Sino ang PANGINOON?” O baka ako'y maging dukha, at ako'y magnakaw, at ang pangalan ng aking Diyos ay malapastangan.

¹⁰Huwag mong siraan ang alipin sa panginoon niya, baka ka sumpain niya, at mapatunayan kang may sala.

¹¹May mga nagmumura sa kanilang ama, at hindi pinagpapala ang kanilang ina.

¹²May mga malinis sa kanilang sariling mga mata, gayunman ay hindi malinis sa karumihan nila.

¹³May lahi, O mapagmataas ang kanilang mga mata, at napakataas ang mga talukap-mata nila!

¹⁴May mga tao na ang mga ngipin ay parang mga tabak, at ang kanilang mga ngipin ay parang mga kutsilyo, upang lamunin ang dukha mula sa lupa, at ang nangangailangan sa gitna ng mga tao.

¹⁵Ang linta ay may dalawang anak, na sumisigaw, “Bigyan mo ako, bigyan mo ako.” May tatlong bagay na kailanman ay hindi nasisiyahan, oo, apat na hindi nagsasabing, “Tama na”:

¹⁶Ang Sheol, at ang baog na bahay-bata; ang lupa na laging uhaw sa tubig; at ang apoy na hindi nagsasabing, “Sapat na.”

¹⁷Ang mata na tumutuya sa kanyang ama, at humahamak ng pagsunod sa kanyang ina, ay tutukain ng mga uwak sa libis, at kakainin ng mga buwitre.

¹⁸May tatlong bagay na totoong kagila-gilalas sa akin; oo, apat na hindi ko nauunawaan:

¹⁹ang daan ng agila sa himpapawid, ang daan ng ahas sa ibabaw ng mga bato, ang daan ng sasakyan sa gitna ng dagat, at ang daan ng lalaki na kasama ng isang dalaga.

²⁰Ganito ang lakad ng babaing mapangalunya: Siya'y kumakain, at bibig niya'y pinupunasan, at nagsasabi, “Wala akong nagawang kasamaan.”

²¹Nanginginig ang lupa sa ilalim ng tatlong bagay; mayroong apat na hindi niya mapasan:

²²kapag naging hari ang isang alipin, at ang isang hangal, kapag nabubusog ng pagkain;

²³ang isang babaing di-kanaisnais kapag nakapag-asawa; at ang isang aliping babae, kapag ang kanyang panginoong babae ay hinalinhan niya.

²⁴May apat na bagay na maliliit sa lupa, ngunit sila'y matatalinong lubha:

²⁵Ang mga langgam ay hindi malakas na sambayanan, gayunma'y nag-iimbak ng kanilang pagkain sa tag-araw;

²⁶hindi makapangyarihang bayan ang mga kuneho, gayunma'y gumagawa sila ng bahay sa malalaking bato;

²⁷walang hari ang mga balang, gayunma'y lumalabas silang lahat na nakahanay;

²⁸mahahawakan ng iyong mga kamay ang butiki, gayunman ito'y nasa mga palasyo ng mga hari.

²⁹May tatlong bagay na sa kanilang lakad ay marangal; may apat na marangal sa kanilang paghakbang:

³⁰ang leon na pinakamalakas sa mga hayop, at sa kanino man ay hindi tumatalikod;

³¹ang tandang na magilas; ang kambing na lalaki, at ang haring palakad-lakad sa harap ng kanyang bayan.

³²Kung ikaw ay naging hangal, na ang sarili'y itinaas, o kung ikaw ay nagbabalak ng kasamaan, ilagay sa iyong bibig ang iyong kamay.

³³Sapagkat sa pagpisil sa gatas, mantekilya'y lumalabas; at sa pagpisil sa ilong, dugo'y dumadaloy, gayon ang pagpisil sa poot, lumilikha ng sigalot.