Read Ang Biblia, 2001 Mga Kawikaan 9 Bible Online

Mga Kawikaan 9 - Ang Biblia, 2001 bible

Mga Kawikaan 9

¹Itinayo ng karunungan ang kanyang bahay, ang kanyang pitong haligi ay kanyang inilagay.[1]

²Mga hayop niya ay kanyang kinatay, ang kanyang alak ay kanyang hinaluan, kanya ring inihanda ang kanyang hapag-kainan.

³Sinugo niya ang kanyang mga alilang babae upang manawagan, mula sa pinakamatataas na dako sa bayan,

⁴“Sinumang walang muwang, pumasok dito!” Sa kanya na mahina sa pag-unawa, ay sinasabi niya,

⁵“Halikayo, kumain kayo ng aking tinapay, at uminom kayo ng alak na aking hinaluan.

⁶Iwan ninyo ang kawalang muwang at kayo'y mabuhay, at kayo'y lumakad na may pang-unawa.”

⁷Siyang sumasaway sa manlilibak ay nakakakuha ng kahihiyan, at siyang sumasaway sa masama ay siya ring nasasaktan.

⁸Huwag mong sawayin ang manlilibak, baka kamuhian ka niya; sawayin mo ang marunong, at kanyang iibigin ka.

⁹Turuan mo ang marunong, at dudunong pa siyang lalo, turuan mo ang matuwid, at sa kaalaman siya'y lalago.

¹⁰Ang takot sa PANGINOON ang pasimula ng karunungan, at ang pagkakilala sa Banal ay kaunawaan.

¹¹Sapagkat sa pamamagitan ko ay dadami ang iyong mga araw, at ang mga taon ng iyong buhay ay madaragdagan.

¹²Kung ikaw ay pantas, pantas ka para sa sarili mo, at kung ikaw ay manlibak, mag-isa kang magpapasan nito.

¹³Ang hangal na babae ay madaldal; siya'y magaslaw at walang nalalaman.

¹⁴Siya'y nauupo sa pintuan ng kanyang bahay, sa isang upuan sa matataas na dako ng bayan,

¹⁵upang tawagin ang mga nagdaraan, na matuwid na humahayo sa kanilang mga lakad.

¹⁶“Sinumang walang muwang ay pumasok dito!” At sa kanya na kulang sa pag-unawa, ay kanyang sinasabi,

¹⁷“Ang ninakaw na tubig ay matamis, ang tinapay na kinakain sa lihim ay kanais-nais.”

¹⁸Ngunit hindi niya nalalaman na ang mga patay ay naroon, na ang mga panauhin niya ay nasa mga kalaliman ng Sheol.