Read Ang Biblia, 2001 Eclesiastes 10 Bible Online

Eclesiastes 10 - Ang Biblia, 2001 bible

Eclesiastes 10

¹Ang mga patay na langaw ay nagpapabaho sa pamahid ng manggagawa ng pabango; gayon ang munting kahangalan ay sumisira ng karunungan at karangalan.

²Ang puso ng taong matalino ay humihila sa kanya tungo sa kanan, ngunit ang puso ng hangal ay tungo sa kaliwa.

³Maging kapag ang hangal ay lumalakad sa daan, sa katinuan siya ay kulang, at kanyang sinasabi sa bawat isa, na siya'y isang hangal.

⁴Kung ang galit ng pinuno ay bumangon laban sa iyo, huwag kang umalis sa iyong kinalalagyan, sapagkat ang pagiging mahinahon ay makapagtutuwid sa malalaking kamalian.

⁵May isang kasamaan na nakita ko sa ilalim ng araw na tila kamalian na nanggagaling sa pinuno:

⁶ang kahangalan ay nakaupo sa maraming matataas na lugar, at ang mayaman ay umuupo sa mababang dako.

⁷Nakakita ako ng mga alipin na nakasakay sa mga kabayo, at ng mga pinuno na lumalakad sa lupa na gaya ng mga alipin.

⁸Siyang humuhukay ng balon ay mahuhulog doon; at ang lumulusot sa pader ay kakagatin ng ulupong.

⁹Ang tumatabas ng mga bato ay masasaktan niyon; at ang nagsisibak ng kahoy ay nanganganib doon.

¹⁰Kung ang bakal ay pumurol, at hindi ihasa ninuman ang talim, dapat nga siyang gumamit ng higit na lakas; ngunit ang karunungan ay tumutulong upang ang isang tao'y magtagumpay.

¹¹Kung ang ahas ay kumagat bago mapaamo, wala ngang kapakinabangan sa nagpapaamo.

¹²Ang mga salita ng bibig ng matalino ay magbibigay sa kanya ng pakinabang; ngunit ang mga labi ng hangal ang uubos sa sarili niya.

¹³Ang pasimula ng mga salita ng kanyang bibig ay kahangalan, at ang wakas ng kanyang salita ay makamandag na kaululan.

¹⁴Sa mga salita, ang hangal ay nagpaparami, bagaman walang taong nakakaalam kung ano ang mangyayari; at pagkamatay niya ay sinong makapagsasabi sa kanya ng mangyayari?

¹⁵Ang gawa ng hangal ay nagpapahirap sa kanya, kaya't hindi niya nalalaman ang daan patungo sa lunsod.

¹⁶Kahabag-habag ka, O lupain, kapag ang iyong hari ay isang bata, at ang iyong mga pinuno ay nagpipista sa umaga!

¹⁷Mapalad ka, O lupain, kung ang iyong hari ay anak ng mga malalayang tao, at ang iyong mga pinuno ay nagpipista sa kaukulang panahon para sa ikalalakas, at hindi sa paglalasing!

¹⁸Sa katamaran ay bumabagsak ang bubungan; at sa di pagkilos ay tumutulo ang bahay.

¹⁹Ang tinapay ay ginagawa sa paghalakhak, at ang alak ay nagpapasaya sa buhay: at ang salapi ay sumasagot sa lahat ng mga bagay.

²⁰Huwag mong sumpain ang hari kahit sa iyong isipan; at huwag mong sumpain ang mayaman kahit sa iyong silid tulugan; sapagkat isang ibon sa himpapawid ang magdadala ng iyong tinig, at ilang nilalang na may pakpak ang magsasabi ng bagay.