Read Ang Biblia, 2001 Awit ng mga Awit 1 Bible Online

Awit ng mga Awit 1 - Ang Biblia, 2001 bible

Awit ng mga Awit 1

¹Ang awit ng mga awit na kay Solomon. Babae

²Hagkan niya sana ako ng mga halik ng kanyang bibig! Sapagkat mas mabuti kaysa alak ang iyong pag-ibig,

³ang iyong mga langis na pambuhos ay mabango; langis na ibinuhos ang pangalan mo; kaya't ang mga dalaga'y umiibig sa iyo.

⁴Palapitin mo ako sa iyo, magmadali tayo. Dinala ako ng hari sa mga silid niya. Kami ay matutuwa at sa iyo'y magsasaya. Aming itataas ng higit kaysa alak ang pag-ibig mo, matuwid ang pag-ibig nila sa iyo.

⁵Ako'y maitim, ngunit kahali-halina, O kayong mga anak na babae ng Jerusalem, gaya ng mga tolda sa Kedar, gaya ng mga tabing ni Solomon.

⁶Huwag ninyo akong masdan dahil sa ako'y maitim, sapagkat sinunog ako ng araw. Ang mga anak ng aking ina ay galit sa akin, ginawa nila akong tagapangalaga ng mga ubasan; ngunit ang sarili kong ubasan ay hindi ko nabantayan.

⁷Sabihin mo sa akin, ikaw na minamahal ng aking kaluluwa, saan ka nagpapastol ng iyong kawan, saan mo pinahihiga sa katanghalian; sapagkat bakit ako'y magiging gaya ng nalalambungan, sa tabi ng mga kawan ng iyong mga kasamahan? Mangingibig

⁸Kung hindi mo nalalaman, O ikaw na pinakamaganda sa mga babae, sumunod ka sa mga landas ng kawan, at ipastol mo ang mga anak ng kambing sa tabi ng mga tolda ng mga pastol.

⁹Aking itinutulad ka, O aking sinta, sa isang kabayo sa mga karwahe ni Faraon.

¹⁰Pinagaganda ng mga pahiyas ang iyong mga pisngi, ang iyong leeg ng mga kuwintas na palamuti.

¹¹Igagawa ka namin ng mga gintong kuwintas, na may mga pilak na pahiyas. Babae

¹²Samantalang ang hari ay nasa kanyang hapag, ang aking nardo ay nagsasabog ng kanyang kabanguhan.

¹³Ang aking mahal ay gaya ng supot ng mira para sa akin, na humihilig sa pagitan ng aking dibdib.

¹⁴Ang aking sinta para sa akin ay kumpol na bulaklak ng hena sa mga ubasan ng En-gedi. Lalaki

¹⁵O napakaganda mo, aking sinta, totoong, ikaw ay maganda; mga kalapati ang iyong mga mata. Babae

¹⁶O napakaganda mo, aking sinta, kaakit-akit na tunay, ang ating higaan ay luntian.

¹⁷Ang mga biga ng ating bahay ay mga sedro, ang kanyang mga bubong ay mga sipres.