Read Ang Biblia, 2001 Awit ng mga Awit 5 Bible Online

Awit ng mga Awit 5 - Ang Biblia, 2001 bible

Awit ng mga Awit 5

¹Ako'y dumating sa aking halamanan, kapatid ko, kasintahan ko, aking tinipon ang aking mira pati ang aking pabango, kinain ko ang aking pulot-pukyutan pati ang aking pulot; ininom ko ang aking alak pati ang aking gatas. Mga Babae Magsikain kayo, O mga kaibigan; at magsiinom: magsiinom kayo nang sagana, mga mangingibig!

²Ako'y nakatulog, ngunit ang aking puso ay gising. Makinig! ang aking sinta ay tumutuktok. Mangingibig “Pagbuksan mo ako, kapatid ko, sinta ko, kalapati ko, ang aking walang kapintasan, sapagkat ang aking ulo ay basa ng hamog, ang bungkos ng aking buhok ng mga patak ng gabi.”

³Hinubad ko na ang aking kasuotan, paano ko ito isusuot? Hinugasan ko ang aking mga paa paano ko sila parurumihin?

⁴Isinuot ng aking sinta ang kanyang kamay sa butas ng pintuan, at ang aking puso ay nanabik sa kanya.

⁵Ako'y bumangon upang pagbuksan ang aking sinta; at sa aking mga kamay ay tumulo ang mira, at sa aking mga daliri ang lusaw na mira, sa mga hawakan ng trangka.

⁶Pinagbuksan ko ang aking sinta, ngunit ang aking sinta ay tumalikod at umalis na. Pinanghina na ako ng aking kaluluwa nang siya'y magsalita. Aking hinanap siya, ngunit hindi ko siya natagpuan; tinawag ko siya, ngunit hindi siya sumagot.

⁷Natagpuan ako ng mga tanod, habang sila'y naglilibot sa lunsod, binugbog nila ako, ako'y kanilang sinugatan, inagaw nila ang aking balabal, ng mga bantay na iyon sa pader.

⁸Pinagbibilinan ko kayo, O mga anak na babae ng Jerusalem, kung inyong matagpuan ang aking sinta, inyong saysayin sa kanya, na ako'y may sakit na pagsinta.

⁹Ano ang iyong mahal na higit kaysa ibang mahal, O ikaw na pinakamaganda sa mga babae? Ano ang iyong mahal na higit kaysa ibang mahal, na gayon ang iyong bilin sa amin?

¹⁰Ang aking minamahal ay maningning at mamula-mula, na namumukod-tangi sa sampung libo.

¹¹Ang kanyang ulo ay pinakamainam na ginto; ang bungkos ng kanyang buhok ay maalon-alon at kasing-itim ng uwak.

¹²Ang kanyang mga mata ay tulad ng mga kalapati sa tabi ng mga bukal ng tubig; na hinugasan ng gatas at tamang-tama ang pagkalagay.

¹³Ang kanyang mga pisngi ay gaya ng pitak ng mga pabango, na nagsasabog ng halimuyak. Ang kanyang mga labi ay mga liryo, na nagbibigay ng lusaw na mira.

¹⁴Ang kanyang mga kamay ay mga singsing na ginto, na nilagyan ng mga hiyas. Ang kanyang katawan ay gaya ng yaring garing na binalot ng mga zafiro.

¹⁵Ang kanyang hita ay mga haliging alabastro, na inilagay sa mga patungang ginto. Ang kanyang anyo ay gaya ng Lebanon na marilag na gaya ng mga sedro.

¹⁶Ang kanyang pananalita ay pinakamatamis; at siya'y totoong kanais-nais. Ito'y aking sinta at ito'y aking kaibigan, O mga anak na babae ng Jerusalem.