Read Ang Biblia, 2001 Awit ng mga Awit 7 Bible Online

Awit ng mga Awit 7 - Ang Biblia, 2001 bible

Awit ng mga Awit 7

¹Napakaganda ng iyong mga paa sa mga sandalyas O mala-reynang babae! Ang mga bilugan mong hita ay gaya ng mga hiyas, na gawa ng bihasang kamay.

²Ang iyong pusod ay gaya ng bilog na mangkok, na hindi nawawalan ng alak na may halo. Ang iyong tiyan ay bunton ng trigo, na napapaligiran ng mga liryo.

³Ang iyong dalawang suso ay gaya ng dalawang batang usa, na mga kambal ng inahing usa.

⁴Ang iyong leeg ay gaya ng toreng garing. Ang iyong mga mata ay gaya ng mga tipunan ng tubig sa Hesbon, sa tabi ng pintuang-bayan ng Batrabbim. Ang iyong ilong ay gaya ng tore ng Lebanon na nakatanaw sa Damasco.

⁵Pinuputungan ka ng iyong ulo gaya ng Carmel, at ang umaalon mong buhok ay gaya ng kulay ube; ang hari ay nabibihag sa mga tirintas niyon.

⁶Napakaganda at kaaya-aya ka! O minamahal, kaakit-akit na dalaga!

⁷Ikaw ay magilas na parang puno ng palma, at ang iyong mga suso ay tulad ng mga kumpol nito.

⁸Sinasabi kong ako'y aakyat sa puno ng palma, at hahawak sa mga sanga niyon. Ang iyong mga suso sana ay maging gaya ng mga buwig ng puno ng ubas, at ang bango ng iyong hininga ay gaya ng mga mansanas,

⁹at ang iyong mga halik ay gaya ng pinakamainam na alak, na tumutulo nang marahan, na dumudulas sa mga labi at ngipin.

¹⁰Ako'y sa aking minamahal, at ang kanyang pagnanasa ay para sa akin.

¹¹Halika, sinta ko, pumunta tayo sa mga bukid, manirahan tayo sa mga nayon;

¹²magtungo tayo nang maaga sa mga ubasan, at tingnan natin kung may buko na ang puno ng ubas, kung ang kanyang mga bulaklak ay bumuka na, at kung ang mga granada ay namumulaklak. Doo'y ibibigay ko sa iyo ang aking pag-ibig.

¹³Ang mga mandragora ay nagsasabog ng bango, at nasa ating mga pintuan ang lahat ng piling bunga, mga luma at bago, na aking inilaan para sa iyo, O sinta ko.