Read Ang Biblia, 2001 Isaias 1 Bible Online

Isaias 1 - Ang Biblia, 2001 bible

Isaias 1

¹Ang pangitain ni Isaias na anak ni Amoz, na kanyang nakita tungkol sa Juda at Jerusalem, sa mga araw nina Uzias, Jotam, Ahaz, at Hezekias, mga hari ng Juda.

²Dinggin mo, O langit, at pakinggan mo, O lupa, sapagkat nagsalita ang PANGINOON: “Ako'y nag-alaga at nagpalaki ng mga anak, ngunit sila'y naghimagsik laban sa akin.

³Nakikilala ng baka ang kanyang panginoon, at ng asno ang sabsaban ng kanyang panginoon ngunit ang Israel ay hindi nakakakilala, ang bayan ko ay hindi nakakaunawa.”

⁴Ah, bansang makasalanan, bayang punô ng kasamaan, anak ng mga gumagawa ng kasamaan, mga anak na gumagawa ng kabulukan! Tinalikuran nila ang PANGINOON, hinamak nila ang Banal ng Israel, sila'y lubusang naligaw.

⁵Bakit kayo'y hahampasin pa, na kayo'y patuloy sa paghihimagsik? Ang buong ulo ay may sakit, at ang buong puso ay nanghihina.

⁶Mula sa talampakan ng paa hanggang sa ulo ay walang kagalingan, kundi mga sugat, mga galos, at sariwang latay; hindi pa naaampat, o natalian man, o napalambot man ng langis.

⁷Ang inyong lupain ay giba, ang inyong mga lunsod ay tupok ng apoy; ang inyong lupain ay nilalamon ng mga dayuhan sa inyong harapan; iyon ay giba, tulad nang winasak ng mga dayuhan.

⁸At ang anak na babae ng Zion ay naiwang parang kubol sa isang ubasan, parang kubo sa taniman ng mga pipino, parang lunsod na nakubkob.

⁹Malibang ang PANGINOON ng mga hukbo ay mag-iwan sa atin ng ilang nakaligtas naging gaya sana tayo ng Sodoma, at naging gaya sana tayo ng Gomorra.

¹⁰Pakinggan ninyo ang salita ng PANGINOON, kayong mga pinuno ng Sodoma! Makinig kayo sa kautusan ng ating Diyos, kayong bayan ng Gomorra!

¹¹“Ano sa akin ang dami ng inyong mga handog? sabi ng PANGINOON; punô na ako sa mga lalaking tupa na handog na sinusunog, at ang taba ng mga pinatabang baka; at ako'y hindi nalulugod sa dugo ng mga toro, mga kordero at ng mga kambing na lalaki.

¹²“Nang kayo'y dumating upang tingnan ang aking mukha, sinong humiling nito mula sa inyong kamay na inyong yurakan ang aking mga bulwagan?

¹³Huwag na kayong magdala ng mga walang kabuluhang alay; ang insenso ay karumaldumal sa akin. Ang bagong buwan, ang Sabbath, at ang pagtawag ng mga kapulungan — hindi ko na matiis ang kasamaan at ang banal na pagpupulong.

¹⁴Ang aking kaluluwa ay namumuhi sa inyong mga bagong buwan at sa inyong mga takdang kapistahan, ang mga iyan ay pasanin para sa akin. Ako'y pagod na sa pagpapasan ng mga iyan.

¹⁵Kapag inyong iniunat ang inyong mga kamay, ikukubli ko ang aking mga mata sa inyo; kahit na marami ang inyong panalangin, hindi ako makikinig; ang inyong mga kamay ay punô ng dugo.

¹⁶Maghugas kayo ng inyong sarili, maglinis kayo; alisin ninyo ang kasamaan ng inyong mga gawa sa aking paningin; tumigil kayo sa paggawa ng kasamaan,

¹⁷matuto kayong gumawa ng mabuti; inyong hanapin ang katarungan, inyong ituwid ang paniniil; inyong ipagtanggol ang mga ulila, ipaglaban ninyo ang babaing balo.

¹⁸“Pumarito kayo ngayon, at tayo'y mangatuwiran sa isa't isa, sabi ng PANGINOON: bagaman ang inyong mga kasalanan ay tulad ng matingkad na pula, ang mga ito'y magiging mapuputi na parang niyebe; bagaman ito'y mapulang-mapula, ang mga ito'y magiging parang balahibo ng tupa.

¹⁹Kung kayo'y sasang-ayon at magiging masunurin, kayo'y kakain ng mabubuting bagay ng lupain;

²⁰ngunit kung kayo'y magsitanggi at maghimagsik, kayo'y lalamunin ng tabak; sapagkat ang bibig ng PANGINOON ang nagsalita.”

²¹Paanong ang tapat na lunsod ay naging upahang babae,[1] siya na puspos ng katarungan! Ang katuwiran ay tumatahan sa kanya, ngunit ngayo'y mga mamamatay-tao.

²²Ang iyong pilak ay naging dumi, ang iyong alak ay nahaluan ng tubig.

²³Ang iyong mga pinuno ay mga rebelde, at kasama ng mga mapaghimagsik. Bawat isa'y nagnanais ng mga suhol, at naghahangad ng mga regalo. Hindi nila ipinagtatanggol ang ulila, o nakakarating man sa kanila ang usapin ng babaing balo.

²⁴Kaya't ang PANGINOON, Diyos ng mga hukbo, ang Makapangyarihan ng Israel, ay nagsasabi, “Ah, aking ibubuhos ang aking poot sa aking mga kaaway, at maghihiganti ako sa aking mga kaaway.

²⁵Aking ibabaling ang aking kamay laban sa iyo, at aking sasalaing lubos ang iyong dumi tulad ng lihiya, at aalisin ko ang lahat ng iyong tingga.

²⁶At aking ibabalik ang iyong mga hukom na gaya ng una, at ang iyong mga tagapayo na tulad ng pasimula. Pagkatapos ay tatawagin kang lunsod ng katuwiran, ang tapat na lunsod.”

²⁷Ang Zion ay tutubusin ng katarungan, at ang kanyang mga nanunumbalik sa pamamagitan ng katuwiran.

²⁸Ngunit magkasamang lilipulin ang mga mapaghimagsik at mga makasalanan, at silang tumalikod sa PANGINOON ay magwawakas.

²⁹Ngunit ikahihiya mo ang mga punungkahoy na inyong kinagigiliwan; at kayo'y mapapahiya dahil sa inyong piniling mga halamanan.

³⁰Sapagkat kayo'y magiging parang kahoy[2] na ang dahon ay nalalanta, at parang halamanan na walang tubig.

³¹Ang malakas ay magiging parang bagay na madaling masunog, at ang kanyang gawa ay parang kislap, at kapwa sila magliliyab at walang papatay sa apoy.