Read Ang Biblia, 2001 Isaias 13 Bible Online

Isaias 13 - Ang Biblia, 2001 bible

Isaias 13

¹Ang pahayag tungkol sa Babilonia na nakita ni Isaias na anak ni Amoz.

²Maglagay kayo ng isang hudyat sa bundok na walang tanim, sumigaw kayo nang malakas sa kanila, inyong senyasan ng kamay, upang sila'y magsipasok sa mga pintuang-bayan ng mga mahal na tao.

³Aking inutusan ang aking mga itinalaga, aking ipinatawag ang aking mga mandirigma, ang aking mga anak na nagsasayang may pagmamalaki, upang isagawa ang aking galit.

⁴Pakinggan ninyo ang ingay sa mga bundok, na gaya ng napakaraming tao! Pakinggan ninyo ang ingay ng mga kaharian, ng mga bansa na nagtitipon! Tinitipon ng PANGINOON ng mga hukbo ang hukbo para sa pakikipaglaban.

⁵Sila'y nagmumula sa malayong lupain, mula sa dulo ng kalangitan, ang PANGINOON at ang mga sandata ng kanyang galit, upang wasakin ang buong lupain.

⁶Manangis kayo, sapagkat ang araw ng PANGINOON ay malapit na; ito'y darating na gaya ng pagkawasak mula sa Makapangyarihan sa lahat!

⁷Kaya't lahat ng kamay ay manghihina, at bawat puso ng tao ay manlulumo,

⁸at sila'y mababalisa. Mga pagdaramdam at mga kapanglawan ang daranasin nila; sila'y maghihirap na gaya ng babaing nanganganak. Sila'y magtitinginan na nanghihilakbot ang kanilang mga mukha ay magliliyab.

⁹Tingnan ninyo, ang araw ng PANGINOON ay dumarating, mabagsik, na may poot at mabangis na galit; upang gawing wasak ang lupa, at upang lipulin mula roon ang mga makasalanan niyon.

¹⁰Sapagkat ang mga bituin ng langit at ang mga buntala nito, ay hindi magbibigay ng kanilang liwanag; ang araw ay magdidilim sa kanyang pagsikat, at hindi ibibigay ng buwan ang kanyang liwanag.

¹¹Aking parurusahan ang sanlibutan dahil sa kanilang kasamaan, at ang masasama dahil sa kanilang kabuktutan; at aking patitigilin ang kahambugan ng palalo, at aking ibababa ang kapalaluan ng malulupit.

¹²Aking gagawin na mas bihira ang mga tao kaysa dalisay na ginto, at ang sangkatauhan kaysa ginto ng Ofir.

¹³Kaya't aking yayanigin ang kalangitan, at ang lupa ay yayanigin mula sa kanyang dako, sa poot ng PANGINOON ng mga hukbo, at sa araw ng kanyang mabangis na galit.

¹⁴At gaya ng isang usang hinahabol, o gaya ng mga tupa na walang magtitipon sa kanila, bawat tao ay babalik sa kanyang sariling bayan, at bawat isa ay tatakas patungo sa kanyang sariling lupain.

¹⁵Bawat matagpuan ay uulusin, at bawat mahuli ay mabubuwal sa tabak.

¹⁶Ang kanilang mga sanggol ay pagluluray-lurayin sa harapan ng kanilang mga mata; ang kanilang mga bahay ay pagnanakawan, at ang kanilang mga asawa ay gagahasain.

¹⁷Tingnan ninyo, aking kinikilos ang mga taga-Media laban sa kanila, na hindi nagpapahalaga sa pilak, at hindi nalulugod sa ginto.

¹⁸Papatayin ng kanilang mga pana ang mga binata; at sila'y hindi maaawa sa bunga ng bahay-bata; ang kanilang mata ay hindi mahahabag sa mga bata.

¹⁹At ang Babilonia, ang kaluwalhatian ng mga kaharian, ang kariktan at ipinagmamalaki ng mga Caldeo, ay magiging gaya ng Sodoma at Gomorra kapag ibinagsak sila ng Diyos.

²⁰Hindi ito matitirahan kailanman, ni matitirahan sa lahat ng mga salinlahi, ni magtatayo roon ng tolda ang taga-Arabia, ni pahihigain doon ng mga pastol ang kanilang kawan.

²¹Kundi maiilap na hayop sa ilang ang magsisihiga roon, at ang kanilang mga bahay ay mapupuno ng mga hayop na nagsisiungal; at mga avestruz ay maninirahan doon, at ang mga demonyong kambing ay magsasayaw doon.

²²At ang mga asong-gubat ay magsisihiyaw sa kanilang mga muog, at ang mga chakal sa magagandang palasyo; at ang kanilang panahon ay malapit nang sumapit, at ang kanilang mga araw ay hindi pahahabain.